Hamdi Salihi do të ishte viktima e parë e përzgjedhjes paraprake të lojtarëve që do të bëheshin gati për në Euro 2016. Kontribues te kombëtarja prej dhjetë vitesh, ai nuk u pa nga stafi i kombëtares, posaçërisht nga tekniku italian, si i përshtatshëm për të qenë më së paku mes futbollistëve të listës paraprake.
Reagimi i shkodranit do të qe diçka mes përmbajtjes dhe mospërmbajtjes, por, sidoqoftë, ai e shprehu pakënaqësinë dhe zhgënjimin.
Për të ardhur mbrëmë te shkurtimi tjetër i listës, që e lë atë përfundimisht me 23 lojtarë.
Berat Gjimshiti, Amir Rrahmani, Milot Rashica dhe Herolind Shala nuk do mund të bëhen pjesë e historisë, teksa duhet të bëjnë rrugën jo drejt Francës, por drejt shtëpive të tyre.
Trajneri De Biazi do të dalë sot në një konferencë për shtyp, ku do të japë dhe shpjegimet për zgjedhjet e bëra.
Ndërsa për tre prej emrave ishte thuajse e pritshme lënia jashtë listës, paksa i habitshëm është vendimi për Gjimshitin. Veç faktit që luan në kampionatin italian, me Atalantën, e në tre ndeshjet e fundit të Serisë A qe pjesë e formacionit të parë, duke luajtur për 270 minuta, ai ka lënë mbresa që në debutimin e tij me kombëtaren. Pavarësisht moshës së re, ai ka treguar pjekuri e saktësi në lojën e tij, duke qenë në të njëjtën kohë dhe thuajse i pari lojtar i përshtatur aq shpejt me grupin.
Eshtë pikërisht ky emër për të cilin kanë nisur dhe debatet e para, që me shumë mundësi do të shtohen gjatë ditëve në vazhdim.
Në fund, të 23 lojtarët që do ta përfaqësojnë Shqipërinë në Europianin e Francës janë:
Berisha, Hoxha, Shehi, Ajeti, Aliji, Mavraj, Cana, Hysaj, Veseli, Agolli, Memushaj, Kaçe, Lila, Basha, Roshi, Lenjani, Xhaka, Abrashi, Kukeli, Balaj, Cikalleshi, Sadiku dhe Gashi. /tesheshi.com/
