Moti i keq me reshje intensive shiu u zhvendos këto ditë në Greqi, duke shkaktuar dëme të mëdha, thuajse në të gjithë territorin helen. Pak ditë më parë, veriu i Italisë ishte nën pushtetin e ujit, ndërsa autoritetet shpallën gjendjen e emergjencës në disa qytete të saj.
Sipas mediave greke, shiu ka shkaktuar përmbytje të mëdha në Athinë, Pire dhe rrethinat e tjera. Mësohet se nga vërshimi i ujit një person, rreth 30 vjeç është marrë nga rrjedha e furishme e për pasojë ka humbur jetën.
Po ashtu, qindra shtëpi e biznese janë pushtuar prej ujit, që arrin në një nivel mbi 30 cm. Banorët e prekur kanë treguar se me përmbytje të tilla nuk janë përballur ndonjëherë më parë.
“Kjo është hera e parë në shumë vite që ndodh dicka e tillë. Kemi patur shira të dendur, por kjo është hera e parë që ka përmbytje në këtë zonë”, thotë një grua.
Forcat zjarrfikse thonë për mediat se kanë marrë mbi 300 telefonata në 24 orët e fundit nga qytetarë që kanë patur probleme në menaxhimin e situatës. Ndërkohë, meteorologët kanë deklaruar se reshjet e shiut do të vijojnë edhe për disa ditë.
Në rast se shirat do të vijojnë me të njëjtin intensitet, autoritetet greke kanë raportuar se mund të ketë edhe mbyllje të përkohshme të metrosë së Athinës. Rreth tre muaj më parë, Greqia u përball me një tjetër situatë të ngjashme, madje niveli i lartë i ujit, sidomos në bodrumet e banesave i mori jetën dy të moshuarve dhe një gruaje.
Mesa duket, Tirana dhe vende të tjera shqiptare nuk janë të vetmet që “mbyten me një pikë ujë”. /tesheshi.com/
