Ndërkohë që të gjithë shqiptarët anembanë u njohën gjerësisht për herë të parë me fenomenin dron gjatë ndeshjes Serbi-Shqipëri, lajme të reja vijnë në lidhje me këtë mjet fluturues, por këtë herë jo më nga një shqiptar, por nga shtetet e Europës.
Gjermania, Franca dhe Italia janë zotuar të bashkëpunojnë që së bashku të zhvillojnë “Euro-dronin” për mbledhje të informacioneve sekrete nga qielli, raporton sot Associated Press.
Të tri shtetet sot janë përkushtuar për një studim dy vjeçar për ndërtimin e një sistemi ajror të pilotuar nga toka, i cili do të jetë i gatshëm brenda një dekade. Përmes një komunikate, këto tri shtete njoftojnë se “sapo të bëhet funksional, sistemi do të kryejë misione afatgjata të inteligjencës, vëzhgimit dhe zbulimit”.
Këto tri shtete e shohin këtë projekt si një mënyrë të fuqizimit të bashkëpunimit në mbrojtje në tregun e ndarë evropian. /tesheshi.com/
