Deputetja e Vetëvendosje-s, Albulena Haxhiu, ka treguar se dje, me rekomandim të mjekut kujdestar, ka dalë nga Qendra Klinike Universitare, ku ka qenë e shtruar prej ditës së premte, pas tronditjes që ka marrë prej asaj që e ka quajtur dhunë policore.
“Aktualisht jam mirë, dhe do të jem në arrest shtëpie, për 30 ditë. Dëshiroj të falënderoj të gjithë ata që këto ditë janë treguar solidarë dhe të dinjitetshëm, në situatën të cilën kalova, të cilën nuk ia uroj askujt që ta provojë”, ka deklaruar deputetja Haxhiu përmes një shkrimi në Facebook.
Ajo shton se vetëm pasi doli nga klinika mori vesh për një fushatë shpifjesh, me qëllim cenimin e dinjitetit të saj, por nuk u mërzit kur pa se sa shumë qytetarë, njerëz të moshave të ndryshme, gra e burra, të profileve të ndryshme profesionale e politike, kishin reaguar në mbështetje, kundër brutalitetit fizik policor dhe kundër brutalitetit moral mediatik.
“Pushteti shtetëror dhe ai privat duhet të jenë gjithnjë të kufizuara me ligj, në mënyrë që të lindin liritë dhe të drejtat publike, grupore dhe individuale. E ne nuk do të ndalemi, deri sa t’i arrijmë këto liri e të drejta, së bashku e për të gjithë”,- përfundon ajo postimin e saj. /tesheshi.com/
