Pasi eliminoi hungarezët e Ferencvaroshit atëherë kur askush nuk e priste, te Partizani bëhen gati për një tjetër surprizë. Një takim i vështirë e pret sonte skuadrën e kryeqytetit shqiptar në “Red Bull Arena” ndaj Salcburgut, por të kuqtë nuk e mendojnë aspak hyrjen në fushë të dorëzuar.
Salcburgu dhe Partizani do të ndeshen këtë mbrëmje në takimin e dytë mes tyre, të vlefshëm për raundin e tretë kualifikues të Champions League-s. Përballja e parë, më 26 korrik, në “Elbasan Arena”, pati përfunduar 0-1 për austriakët, veçse rezultati nuk reflekton atë që u pa në fushë.
Partizani bëri një paraqitje të mirë një javë më parë, duke u ndëshkuar vetëm nga mungesa e theksuar e përvojës. Një 11-metërsh i shkaktuar krejt në mënyrë të panevojshme, e për më tepër, në momentin më të mirë të Partizanit, do të paguhej shtrenjtë, me një humbje të pamerituar.
Por askush nuk është dorëzuar te Partizani. I pari trajneri italian Adolfo Sormani, i cili premton luftë të fortë sportive në fushë.
Për më shumë, te Salcburgu punët nuk janë aq mirë. Shtatë lojtarë do të mungojnë në këtë takim. Përpos kësaj, ekipi ka treguar formë të dobët në Bundesligën austriake. Vetëm një pikë në dy takime, me një humbje e një barazim, është një fakt që flet qartë për situatën e turbullt në skuadrën austriake.
Sfida nis në orën 20:30, me shpresën se do të përfundojë me një kualifikim të Partizanit. /tesheshi.com/
