Demarkacioni me Malin e Zi vazhdon të jetë pika ndarëse mes pozitës dhe opozitës në Kosovë, pasi asnjëra palë nuk po lëkundet nga qëndrimet.
Ndërsa, pozita mendon se ratifikimi i projektligjin për shënjimin e kufirit me Malin e Zi duhet të ndodh sivjet në mënyrë që të liberalizohen vizat, opozita thotë se një kusht i tillë është i papranueshëm.
Nënkryetari i kuvendit nga radhët e PDK-së, njëherit kryetari i komisionit për integrime evropiane, Xhavit Haliti në mbledhjen që mbajti sot ky komision, ripërsëriti qëndrimin se pa miratimin e Demarkacionit nuk ka liberalizim të vizave me Bashkimin Evropian.
Por, kreu i Lëvizjes Vetëvendosje, Visar Ymeri u shpreh se Demarkacioni si kusht përveç që është i papranueshëm askush nuk ka mundur të shpjegoj pse është bërë. Ai ka shtuar se ky kusht sikur të kishte ‘pikë nga qielli’ se askush nuk di ta shpjegojë.
Kurse, Pal Lekaj nga AAK deklaroi se BE nuk ka kërkuar që ky verison aktual i Demarkacionit të votohet si kusht për vizat.
Por Xhavit Haliti i PDK-së, duke iu kundërpërgjigj opozitës tha se nëse Demarkacioni nuk votohet nga ligjvënësit, atëherë qytetarët e vendit nuk do të mund të lëvizin lirshëm, pa viza në vendet e BE-së.
P ashtu edhe kryekuvendari, Kadri Veseli, tha të hënën se institucionet e Kosovës nuk guxojnë të rrezikojnë më tutje me vonesën e miratimit të këtij projekt-ligji, duke i bërë thirrje qeverisë që ta ‘procedojë më shpejt atë’.
“Unë pres që projektligjin për Demarkacion ta kemi sa më shpejt në Kuvend. Është në interesin e vendit që të kalohet demarkacioni. Jemi duke e dëmtuar partneritetin të cilin e kemi më miqtë tanë dhe vetëm me miqtë tanë mund ta kemi Republikën e Kosovës si shtet të pavarur dhe sovran. Jemi duke e dëmtuar procesin zhvillimor të Kosovës”, tha dje Veseli.
Ndryshe, edhe Lista Serbe së fundmi kërkoi që të arrihet një konsensus mes partive politike rreth projektligjit për Demarkacionin, por nuk tregoi nëse për një gjë të tillë kanë ndonjë kushtëzim. /tesheshi.com/
