Një javë pas mbajtjes së zgjedhjeve parlamentare, partitë kosovare janë mbledhur sot te presidenti Hashim Thaçi, për të diskutuar për caktimin e datës së zgjedhjeve lokale.
Ndonëse në takimin e sotëm nuk u vendos data, shumica e përfaqësuesve të partive propozuan datën 22 tetor si datë kur qytetarët duhet t’iu drejtohet kutive të votimit për të zgjedhur përfaqësuesit e pushtetit lokal.
Kryetarja e KQZ-së Valdete Daka, tha se janë në afate ligjore për organizimin e zgjedhjeve lokale dhe se KQZ është e gatshme kurdo që ato shpallen, por ka kërkuar nga partitë që data sa më e hershme të bëhet është më mirë sepse tha se “po shkojmë kah stina e dimrit dhe shumë komuna mund të shkojnë në balotazh dhe certifikimi mund të shtyhet”.
Përfaqësuesi i PDK-së, Uran Ismaili tha se duhet të mendojnë për një afat që nuk i fut në stinën e dimrit por nuk ka propozuar ndonjë datë të caktuar.
Kurse Ismajl Kurteshi nga Vetëvendosje ka propozuar datën 22 tetor të këtij viti që të mbahen zgjedhjet lokale.
Kurteshi ka pasur edhe një kërkesë për kryetaren e KQZ-së që t’i mësojë qytetarët më shumë për të votuar pasi në zgjedhjet parlamentare ka pasur shumë fletëvotime të pavlefshme.
Sikurse VV edhe përfaqësuesi i LDK-së Ismet Beqiri tha se zgjedhjet lokale duhet të mbahen në të dielën e parë brenda afateve ligjore që është data 22 tetor.
Edhe përfaqësuesi i AKR-së Agim Bahtiri ka propozuar datën 22 tetor si datë e përshtatshme për organizimin e zgjedhjeve.
Përfaqësuesi i AAK-së Pal Lekaj, tha se zgjedhjet duhet të mbahen brenda afatit kushtetues dhe datën sa më të hershme.
Edhe Valdete Bajrami nga Nisma për Kosovën ka propozuar dy data, 22 dhe 29 tetorin.
Për mbajtjen e zgjedhjeve me 22 tetor është shprehur edhe përfaqësuesi i LB-së Avni Klinaku si dhe përfaqësuesit e komuniteteve.
Pas propozimeve të bëra nga partitë, presidenti Thaçi tha se do t’i respektojë propozimet e tyre dhe në ditët e ardhshme do t’i shpallë zgjedhjet lokale në pajtim me ligjin./tesheshi.com/
