Nga Luljeta Progni
Spektakli banal që ligjvënësit përcjellin për shqiptarët çdo të enjte në sallën e Kuvendit, bojkoti i opozitës dhe ligjet e rëndësishme të miratuara vetëm me votat e mazhorancës…
Në verën e një viti më parë, Kuvendi mbylli punimet me miratimin e disa ligjeve të rëndësishme për tre prej të cilëve, presidenti nuk e dha pëlqimin. Sesioni tretë kuvendor në shtator të një viti më parë, nisi pikërisht më rrëzimin e dekretit të Presidentit për kthimin e tre ligjeve të rëndësishme, për Policinë e Shtetit, për Këshillin e Lartë të Drejtësisë si dhe ligjin për Funksionimin e Gjykatave Administrative. Të tre këto ligje ishin miratuar në seancën e fundit të Parlamentit, në datën 31 korrik dhe u rrëzuan në seancën e parë të sesionit të ri kuvendor, në shtator 2014.
Në fjalën e tij në këtë seancë të parë kuvendore, kryeministri Rama u shpreh se me kthimin e këtyre ligjeve, kreu i Shtetit Bujar Nishani kishte goditur prioritetet kombëtare. Ligjet u miratuan pa asnjë ndryshim duke shënuar kështu një acarim të mëtejshëm në raportet mes qeverisë edhe Kuvendit me presidentin Nishani.
Inkriminimi i Kuvendit
Arrestimi i dy deputetëve të mazhorancës, është një ndër ngjarjet më të rëndësishme të kësaj legjislature. Ky akt e ka origjinën tek debatet për kriminalizimin e Kuvendit i nisur nga opozita, qysh në sesionin e parë të kësaj legjislature. Debati për kriminalizimin e Kuvendit u kthye në betejën politike të opozitës, kryesisht gjatë vitit që shkoi për t`u finalizuar me seancën e 10 korrikut, ku opozita vendosi të bojkotojë punimet e Kuvendit.
Vendimi erdhi pas përplasjes fizike mes dy deputetëve të mazhorancës, Pjerin Ndreu e Arben Ndoka me deputetin e opozitës Gent Strazimiri. Në emër të opozitës, Strazimiri kishte denoncuar disa herë radhazi me dokumente të cilat sipas tij vërtetonin se deputetë të mazhorancës, kishin të shkuar kriminale. Debati i ashpër i zhvilluar në sallën e Kuvendit të Shqipërisë më 10 korrik 2014, degjeneroi deri në dhunë fizike mes deputetëve për të mbërritur më pas deri në bojkotin e punimeve të Kuvendit nga opozita.
Dekriminalizimi i Kuvendit
Bojkoti opozitar ka zgjatur deri më 24 dhjetor kur pas ndërhyrjeve të herëpashershme të ndërkombëtarëve, mazhoranca dhe opozita u ulën në bisedime për të arritur marrëveshje për kthimin e opozitës në Kuvend. Bojkoti parlamentar i opozitës u ndërpre të martën e fundit të vitit 2014, më 24 dhjetor, pas bisedimesh të gjata mes përfaqësuesve të maxhorancës dhe opozitës.
Me ndërmjetësimin e raportuesit për Shqipërinë në Parlamentin Evropian, Knut Fleckenstein dhe eurodeputetit Eduard Kukan, u nënshkrua marrëveshja ku parashikohej procesi i dekriminalizimit të Kuvendit të Shqipërisë. Pak ditë më pas u ngrit edhe një komision parlamentar për dekriminalizimin e Kuvendit i drejtuar nga deputeti demokrat Oerd Bylykbashi. Kanë kaluar shtatë muaj dhe ky komision ende nuk ka dhënë asnjë rezultat në këtë proces.
Arrestimi i dy deputetëve dhe çështja ‘Doshi’
Pak muaj pas ngritjes së komisionit të dekriminalizimit, në Kuvend plasi debati për çështjen Doshi. Një akuzë e ashpër e deputetit të Partisë Socialiste Tom Doshi, tronditi gjithë politikën shqiptare. Deputeti Tom Doshi, deklaroi se kishte prova se Ilir Meta kishte paguar për vrasjen e tij dhe të deputetit të PD-së Mhill Fufi. Kjo akuzë e Tom Doshit shkaktoi debate të ashpra në Kuvendin e Shqipërisë dhe më gjerë. Seanca të shumta u dominuan nga debate për çështjen Doshi. Akuza e Tom Doshit u vlerësua si e rreme nga Prokuroria, megjithëse ai u arrestua bashkë me deputetin Mark Frroku, ata u liruan pak ditë më pas. Ndërsa deputeti Doshi u lirua nga burgu, Mark Frroku u arrestua sërish pasi ai akuzohet nga drejtësia belge për vrasjen e një shqiptari në Belgjikë në vitin 1999.
Nga avioni tek helikopteri i drogës, debatet në Kuvend për përfshirjen e FA-së në trafik droge
Debati për përfshirje e Forcave të Armatosura në trafikun e drogës ka qënë gjithashtu dominues në disa seanca parlamentare. Gati një vit pas rrëzimit të avionit të drogës në Divjakë, një tjetër ngjarje ndezi debatin parlamentar. Ishte rrëzimi i një helikopteri droge në Spanjë, i cili drejtohej nga piloti shqiptar i Forcave të Armatosura, major Sokol Feka. Helikopteri ishte i mbushur me një ton drogë. Opozita e akuzoi maxhorancën për përfshirje të Forcave të Armatosura në trafikun e drogës duke rikthyer në vëmendje dyshimet për avionë droge, që sipas eksponentëve të opozitës ishin parë në disa zona të vendit kryesisht në Divjakë e Xhadër.
Ligjet e rëndësishme, vetëm me votën e mazhorancës
Gjatë punimeve të Kuvendit në një vit, janë miratuar ligje shumë të rëndësishme, të cilat kanë peshë specifike në kryerjen e reformave të Shqipërisë drejt standardeve që garantojnë anëtarësimin në BE. Këto ligje janë miratuar vetëm me votat e maxhorancës.
Ndër ligjet më të rëndësishme të miratuara në sesionin e tretë dhe të katërt parlamentar në periudhën shtator 2014-korrik2015, përfshihen ligji për pronat, ligji për reformën në Gjkykatën e Lartë që lidhet me reformën në drejtësi, ligji për Gjykatën Administrative, ligji për reformën teritoriale, ligji për hapjen e dosjeve të Sigurimit të Shtetit dhe në fund ligji për Arsimin e Lartë. Përveç këtyre janë një sërë ligjesh të tjera shumë të rëndësishme që lidhen me ekonominë dhe menaxhimin e territorit. Kështu është mbyllur sesioni i katërt i kësaj legjislature parlamentare i dominuar nga konflikte të ashpra politike mes ligjvënësish në sallën e Kuvendit të Shqipërisë, duke iu ofruar shqiptarëve çdo të enjte, debate shterpe e spektakle banale. /tesheshi.com/
