Legjislacioni i ri për mediat publike, i aprovuar dje në parlamentin polak, shihet si një përpjekje për t’i vënë ato nën kontrollin e qeverisë konservatore.
Nën ligjin e ri, drejtuesit kryesorë në radion dhe televizionin publik do të emërohen nga ministri i Thesarit, e jo nga Këshilli Kombëtar i Transmetimit. Po në përputhje me këtë ligj, administruesit dhe anëtarët aktualë të bordit mbikëqyrës të transmetuesve publikë do të largohen menjëherë nga detyra.
Ky legjislacion u kalua mes debatesh në Dhomën e Ulët të parlamentit polak, por numri i votave në favor të tij ishte mjaft i madh. Për të votuan 232 ligjvënës, ndërsa 152 prej tyre u shprehën kundër me votë; abstenuesit ishin 34. Sidoqoftë, amendamentet duhet të miratohen dhe nga Senati e presidenti, sido që nuk pritet të hasin në kundërshti.
Kjo nismë ligjore e debatueshme ishte e fundit në një varg të tillash të miratuara që kur partia konservatore Ligj dhe Drejtësi fitoi zgjedhjet e përgjithshme në tetor.
Arsyetimi i kalimit të legjislacionit të ri për mediat publike u mbështet në argumentin se drejtuesit e tanishëm të radiotelevizionit shtetëror nuk e përmbushin detyrën e tyre të bashkimit dhe të edukimit të popullit, duke shërbyer si mjet propagande për qeverisësit e djeshëm, që sot gjenden në opozitë. /tesheshi.com/
