Dhoma e Lartë e parlamentit të Francës ka aprovuar me shumicë dërrmuese zgjatjen e gjendjes së jashtëzakonshme deri në fund të korrikut, me synimin për t’i mbuluar dhe dy veprimtari sportive të përmasave të mëdha, Euro 2016-tën dhe turneun çiklistik Tour de France.
Për zgjatjen e gjendjes së jashtëzakonshme, në fuqi që prej nëntorit të vitit të shkuar, ka patur 309 vota pro, e vetëm 30 kanë qenë kundër.
Pavarësisht zgjatjes së gjendjes së jashtëzakonshme, policia nuk do të ketë më fuqi për t’i bastisur shtëpitë pa një urdhër gjykate, siç ka bërë më herët.
Në fjalën e tij, ministri i Brendshëm francez, Bernard Cazeneuve, e ka arsyetuar këtë duke thënë se bastisje të tilla nuk kanë më të njëjtin interes operacional.
Në Francë do të zhvillohen në qershor e më tej Kampionati Europian i Futbollit dhe Turi i Francës në çiklizëm. Më parë se të nisin këto veprimtari, do të jetë dhe turneu i tenisit Roland Garros.
“Sfidat e sigurisë do të jenë edhe më komplekse ndërsa përgatitemi të mirëpresim një numër shumë të madh vizitorësh të huaj për Euro 2016-tën,” ka theksuar ministri.
Organizatorët flasin për dy milionë vizitorë gjatë aktivitetit futbollistik europian, kurse miliona të tjerë do të vijnë për të ndjekur turneun e çiklizmit, që nis me hyrjen e korrikut. /tesheshi.com/
