Asambleja Kombëtare në Francë votoi në orët e para të së mërkurës për zgjatjen e gjendjes së jashtëzakonshme në vend deri më 15 korrik të vitit të ardhshëm.
Për zgjatjen e gjendjes së jashtëzakonshme votuan shumica e parlamentarëve, 288 prej tyre; votat kundër qenë vetëm 32. Tani pritet që nisma të marrë dhe aprovimin e Senatit një ditë më pas.
Kjo është hera e pestë e zgjatjes së gjendjes së jashtëzakonshme në Francë. Masat e sigurisë janë në fuqi që prej sulmeve në Paris në nëntorin e 2015-s; është parë e arsyeshme që ato të jenë në fuqi dhe gjatë zgjedhjeve presidenciale e parlamentare, përkatësisht në prill-maj e në qershor.
Që prej luftës algjeriane në vitet ’60 të shekullit të shkuar, kjo do të periudha më e gjatë në Francë me gjendjen e jashtëzakonshme në fuqi.
Zgjatja gjer më 15 korrik do t’i japë mundësi presidentit të ri ta çmojë situatën dhe të vendosë mbi gjendjen e jashtëzakonshme. /tesheshi.com/
