Të dielën paradite, në këtë qytet u organizua një manifestim i ngjashëm me atë të Parisit një vit më parë pas atentateve ndaj redaksisë së Charlie Hedbo-së, për t’u solidarizuar me viktimat e terrorizmit në Turqi e kudo në botë, dhe për ta dënuar ashpër këtë valë të pajustifikuar dhune, aq më tepër nëse ajo ndërmerret në emër të fesë.
Kështu, drejtuesit të komuniteteve kryesore fetare në Elbasan realizuan një marshuan paqeje përgjatë bulevardit kryesor të qytetit me në krah autoritete vendore,përfaqsues të shoqërisë civile dhe qytetarë të ndryshëm.
Nën moton “Jo diskriminimit…Po vëllazërimit”, u vlerësua modeli i bashkëjetesës fetare si një model që duhet ndjekur ngado. Ata u shprehën kundër qasjeve me bazë diskriminimin fetar, si një e keqe që shqetëson jo vetëm komunitetet fetare, por mbarë shoqërinë.
Duke përmendur edhe ngjarjet e fundit që kanë ndodhur në botë, si shpërthimet e ndodhura në harkun kohor të një viti dhe që kanë tronditur gjithë njerëzimin, mesazhi i paqes në këtë marshim ishte i qartë për të gjithë: sa më larg diskriminimit fetar dhe sa më pranë Zotit, sepse vetëm pranë Tij gjejmë paqen e vërtetë.
Ky aktivitet u organizua nga Qendra e Bashkëpunimit Ndërfetar. /tesheshi.com/
