Në Paris hynë në fuqi masat e reja e shumë më të ashpra për të gjithë ata që kapen duke hedhur bishtat e cigareve në tokë apo dysheme. Duhanxhinjtë që do të jenë aq të pakujdesshëm sa kur ta mbarojnë së tymosuri, ta hedhin bishtin e cigares në tokë, do të gjobiten me 68 euro.
Rreth 350 tonë bishta cigaresh hidhen në rrugët e Parisit në një vit, thanë zyrtarët e bashkisë së kryeqytetit francez.
Ndalimi që Franca i bëri tymosjes së duhanit në vende publike, në 2008 u shtri edhe në baret dhe restorantet e vendit. Rreth 28 për qind e qytetarëve francezë janë duhanpirës të rregullt, një shifër relaitivisht e lartë krahasuar me mesataren europiane.
Bishtat e cigareve duan vite të tëra për t’u dekompozuar, kohë gjatë së cilës ato lëshojnë metale të rënda dhe ndotës të tjerë në mjedis. “Këto lëndë toksike janë të dëmshme për mjedisin, si për bimët ashtu edhe për kafshët, e kur hidhen në kanale, mund të ndotin edhe ujin”, thanë autoritetet përmes një njoftimi.
Këtë të enjte, si masë parandaluese për hedhjen e bishtave të cigareve në tokë, hyri në fuqi masa e re e gjobës, me një rritje nga 35 euro në 68 euro.
Masa të tjera që planifikohen nga bashkia janë edhe shpërndarja e rreth 15 mijë tavllave të xhepit, pa pagesë, për parizinët dhe turistët në qytet. /tesheshi.com/
