Grupimi femëror “Ne të gjithë” mbajti sot një demonstratë në Paris për të denoncuar 101 femicidet në Francë që nga fillimi i vitit dhe për t’i kërkuar qeverisë të bëjë më shumë për të luftuar dhunën ndaj grave.
Të veshura me të zeza dhe me një vello ngjyrë vjollce mbi fytyrën e tyre në shenjë zie, 101 gra qëndruan të heshtura në sheshin Pantheon në qendër të qytetit, secila duke mbajtur një pankartë me emrin dhe moshën e viktimave.
Në pankartat e vendosura në tokë mes tyre, gratë kishin shkruar slogane si “Duam të rrimë gjallë” dhe “Dashuri nuk do të thotë të vrasësh”.
“Jemi në 9 tetor dhe 101 gra u vranë nga burrat sepse ishin gra, ne nuk duam të numërojmë më vdekje,” u tha gazetarëve Yuna Mirai, në emër të gupimit.
“Ne po kërkojmë urgjentisht që të krijohen vende akomodimi për gratë dhe fëmijët e tyre që kanë nevojë për një strehë të sigurt,” shtoi ajo, duke pretenduar se 213,000 gra janë në rrezik në Francë.
Numri i femicideve u rrit me 20% në vitin 2021 në Francë, krahasuar me një vit më parë: 122 gra u vranë nga partneri ose ish-partneri i tyre, sipas një raporti të shpallur në fund të gushtit nga Ministria e Brendshme. Në vitin 2020, femicidet u rritën në 102, ndërsa në vitin 2019 ato u ngjitën në 146. Nuk dihet se çfarë dhe nëse periudhat e karantinës kanë luajtur rol në këtë rritje. /tesheshi.com
