Alexander Shprygin, që i përket së djathtës ekstreme dhe i prin grupit të tifozëve rusë, është arrestuar mbrëmë në Tuluzë vetëm dy ditë pas nxjerrjes nga Franca.
Ai bënte pjesë mes 20 tifozëve rusë që do të nxirreshin nga Franca pas tre ditëve përplasjeje mes tifozerive ruse dhe angleze në Marsejë.
Ende nuk është e qartë mënyra se si ai ka rihyrë në Francë. Mes dy postimeve në faqen e tij në Twitter, njëri flet për një rrugë të pazakonshme të ndjekur prej tij për të rihyrë në Francë, e tjetri paraqet pamje filmike brenda stadiumit ku u luajt takimi mes Rusisë dhe Uellsit.
Ndërsa vendi ku zhvillohet Kampionati Europian është ende zyrtarisht në një gjendje të jashtëzakonshme që prej nëntorit të vitit të shkuar, lehtësia me të cilën tifozi problematik rus ka rihyrë në Francë ngre shumë pikëpyetje mbi nivelin e sigurisë.
Vetë Alexander Shprygin ka folur për agjencinë e lajmeve AFP pak para ndalimit të mbrëmshëm. “Jam në ndeshje me një biletë. Autoritetet franceze më thanë se nuk isha deportuar, por vetëm qeshë nxjerrë jashtë vendit; viza ime Shengen nuk është anuluar, e të gjitha vulat janë aty. Kështu që legalisht mund të jem në Bashkimin Europian.”
Zëdhënësi i dikasterit francez të punëve të brendshme, Pierre-Henry Brandet, njoftoi se rasti i tifozit rus do të hetohet, e ai ka për t’u trajtuar me një procedurë administrative apo gjyqësore. /tesheshi.com/
