Zëvendësministri i Jashtëm i Kosovës, Valon Murtezaj deklaroi se ka prova për investime monetare të Rusisë në Kosovë.
Duke folur për Evropën e Lirë, nr. 2 i diplomacisë kosovare tha:
“Ka të dhëna për fonde të shtuara nga ana e Rusisë në fusha të ndryshme të veprimtarisë. Ajo që ka qenë shumë evidente është mbulimi mediatik i ngjarjeve nga mediat e fuqishme ruse, të cilat shpeshherë pastaj edhe i kanë shtrembëruar realitetet, ashtu siç u ka konvenuar atyre. Ne i kemi pasur disa raste brenda në Kosovë, por edhe në rajon”.
Nga ana tjetër. Burim Ramadani nga Qendra Kërkimore për Politikat e Sigurisë, tha se Federata Ruse, në strategjinë të cilën e ka në të ashtuquajturën “lufta informative” për vendosjen e agjendave në opinionet publike të vendeve të ndryshme, një qasje të tillë e ka të drejtuar edhe ndaj Kosovës.
“Kjo, kryesisht ndikohet përmes prodhimit të lajmeve të rrejshme, ndikimit në krijimin e opinionit, në dobësimin e qasjes, përkatësisht perceptimit pozitiv që e ka populli i Kosovës për shtetet perëndimore dhe në rend të parë, në raport me Shtetet e Bashkuara të Amerikës. Ndërkaq, pjesa tjetër, sigurisht që është e ndërlidhur me aspektin e biznesit, përkatësisht me praninë e biznesit të kompanive të lidhura me Rusinë”, theksoi Ramadani. /tesheshi.com/
