Nga Blendi Gashi
Kosova shumë shpejt pritet të hyjë në një krizë të thellë politike. Dhe “fajtorë” për këtë do jenë dy çështjet e mëdha që për shtatë muaj përplasën pozitë e opozitë, pra Demarkacioni dhe Asociacioni, quajtur ndryshe kjo e fundit “Zajednica”.
Dy temat e lartcekura së shpejti do jenë në axhendën kryesore të politikës kosovare, tashmë pas heqjes qafe të “trenit” dhe “murit”.
Kjo është konfirmuar pas një takimi që zhvilloi së fundi presidenti Hashim Thaçi, me kryeparlamentarin Kadri Veseli dhe kryeministrin Isa Mustafa, ku ndër të tjera folën edhe për transformimin e FSK-së në ushtri të Kosovës.
Padyshim se ky takim është një sinjal i qartë për opozitën që duhet të përgatitet pasi që koalicioni qeverisës në javët në vazhdim do nis ofensivën për shtyrjen përpara të dy marrëveshjeve të lartcekura.
Dhe siç duket ka një marrëveshje në heshtje në mes PDK-LDK-së dhe partnerit tjetër koalicionit, “Srpska”, që këta të fundit të votojnë Demarkacionin me premtim të sigurit se do themelohet “Zajednica”.
Kjo gjë forcohet tej mase pas paralajmërimit të kryeministrit Mustafa se Lista Serbe do t’i kthehet institucioneve javën e ardhshme pas një bojkoti disa muajsh.
Sipas të gjitha gjasave, pika e parë e trazimit qeveri-opozitë do jetë “Zajednica”, pasi serbët do kërkojnë së pari themelimin e saj dhe më pas do ta votonin Demarkacionin.
Kjo e dyta nuk pritet të rikthehet në Kuvend të paktën derisa komisioni për matjen e territorit i formuar nga Mustafa të dalë me rezultat final. Ky komision që udhëheqet nga kryeakademiku Hivzi Islami ka nisur punën, por nuk dihet koha se kur do do ia prezantojë qeverisë produktin final të saj.
Opozita por edhe ekspertët Shpejtim Bulliqi e Florim Isufi e kontestojnë fuqishëm këtë komision duke thënë se nuk pritet të japë ndonjë rezultat tjetër përveç atij në favor të ekzekutivit.
Pavarësisht se kohës se kur do tentojë qeveria që ta themelojë Asociacionin dhe Demarkacionin, partitë opozitare ja kanë bërë të qartë se nëse tentojnë t’i ngjallin marrëveshjet në fjalë sërish do përballën me protesta brenda e jashtë institucionit ligjvënës.
Një gjë të tillë paralajmëroi Driton Çaushi nga Vetëvendosje, pas mbledhjes së kryesisë së Kuvendit ku tha se Asociacioni është antikushtetues në 23 nenet e Kushtetutës dhe e kanë gatishmërinë për të kundërshtuar me çdo mjet nëse një gjë e tillë mund të rikthehet në Parlament.
As marrëveshja për Demarkacionin, sipas Çaushit “nuk mund të rikthehet në Kuvend ashtu siç është tani, sepse është dëshmuar se është gabim”.
Kujtojmë se si pasojë e kundërshtimeve opozitare, vitin që shkoi opozita organizoi disa protesta, bllokuan shumë seanca plenare duke hedhur dhe gaz lotsjellës në të cilat është pamundësuar themelimi i dy marrëveshjeve të lartcekura. /tesheshi.com/
