Agjencia e lajmeve Associated Press ka njoftuar dje se organi drejtues i futbollit në Europë po përgatit një tjetër dënim për kampionët e Shqipërisë.
Drejtuesi i njësisë disiplinore dhe të integritetit në UEFA, Emilio Garcia, e ka quajtur një “dënim paraprak” përjashtimin për një sezon të Skënderbeut nga aktivitetet europiane.
“Organet disiplinore të UEFA-s po shqyrtojnë masa të vërteta disiplinore,” ka bërë të ditur dje ai në Konventën Ndërkombëtare të Sporteve.
UEFA u bazua fillimisht në dyshimet për trukim të dy ndeshjeve kualifikuese të Champions League-s, e dy ndeshjeve në grup në Europa League në 2015-n. Nga çfarë ka deklaruar Emilio Garcia, UEFA dyshon se Skënderbeu është përfshirë gjithashtu në fiksimin e rreth 50 ndeshjeve në nivel kombëtar që nga viti 2011.
Kampionët e Shqipërisë u lanë këtë verë jashtë tureve paraeliminatore të Champions League-s para se të ndesheshin me hungarezët e Ferencvaroshit. Dënimin e UEFA-s do ta linte në fuqi dhe CAS-i, Gjykata e Arbitrazhit Sportiv. /tesheshi.com/
