Nga Blendi Gashi
Sistemi i drejtësisë në Kosovë, që nga paslufta ka çaluar me të madhe ku besimi i qytetarëve çdo vit ka shkuar duke rënë me të madhe. Kjo u konfirmua së fundmi edhe në një anketë të realizuar ku vetëm 1/4 e të anketuarëve kanë deklaruar se i besojnë gjykatave dhe Prokurorisë.
Dhe për ta ringjallur këtë fushë, ministri i Drejtësisë Abelard Tahiri ka paralajmëruar nisjen e refomave të thella nga 7 shkurti. Sipas tij kjo iniciativë është ndërmarrë për t’i dhënë përgjigje nëse sistemi i drejtësisë është adekuat, i unifikuar dhe në përputhje me rendin demokratik, standardet ndërkombëtare dhe në vijë me orientimin e Kosovës për integrim në Bashkim Evropian.
“Rishikimi funksional, paraqet një prej reformave më të thella të bëra ndonjëherë në Republikën e Kosovës, proces ky që do të fillojë së shpejti, përkatësisht me 7 shkurt, dhe do të vazhdoj për muaj të tërë, derisa ne si institucione të shterim të gjitha debatet e nevojshme dhe të arrijmë në konkluzione se çfarë duhet të ndryshojmë dhe si duhet ti ndryshojmë, në mënyrë që të kemi një sistem të drejtësisë që është efikas, i drejtë dhe llogaridhënës” tha Tahiri.
Por kjo iniciativë e Ministrisë së Drejtësisë po shihet me skepticizëm nga opozita dhe shoqëria civile duke parë se që 18 vite paslufte ky sistem vetëm sa është degraduar dhe këndellja nuk po shihet se është prioritet as nga qeveria aktuale.
Deputetja e Vetëvendosjes, Albulena Haxhiu, thotë se nuk ka shumë informacione për reformëm e paralajmëruar dhe nuk e di se cili është qëllimi i saj për shkak se nuk ka parë ndonjë propozim konkret as edhe te programi i qeverisë për të këndellur fushën e drejtësisë.
“Nuk shoh qasje serioze të kësaj reforme. Nga projektligjet që i ka procedu Ministria e Drejtësisë s’kam parë asnjë strategji konkrete për ta reformuar sistemin e drejtësisë, ka vetëm veprime ad-hock. Nuk kam parë asnjë veprim për procesin e Vettingut për ta shkapur sistemin e drejtësisë, andaj nuk jam e bindur që reforma nuk mund të ndodh as nga qeveria aktuale”, thotë Haxhiu për tesheshi.com.
Ehat Miftaraj, nga Instituti i Drejtësisë shprehet skeptik se iniciativa në fjalë mund të jetë frytëdhënëse.
“Fatkeqësisht veprimet e fundit të kabinetit qeveritar ku merr pjesë dhe ministri i Drejtësisë dhe ai i Punëve të Brendshme janë përcjellur me skandale dhe vendime të kundërligjshme që kontestojnë rëndë integritetin dhe besimin e qytetarëve se të njëjtit qëllim parësor kanë me të vërtetë sundimin e ligjit në Kosovë”, thotë Miftaraj për tesheshi.com.
Ai shprehet se rishikimi funksional i drejtësisë është një proces shumë i rëndësishëm për të bërë një vlerësim të gjithmbarshëm të legjislacionit të aplikueshëm, mekanzimave në fuqi, koordinimit dhe bashkëpunimit, si dhe vlerësimit të pengesave që paraqiten në praktikë në këtë sistem.
“Përderisa, rishikimi funksional është nevojë dhe e domosdoshme, rëndësi ka se si i njëjti dëshiron të zbatohet në praktikë, dhe nëse i njëjti do të shfrytëzohet për të përmirësuar kornizën ligjore dhe mekanizmave të nevojshëm në luftimin e kriminalitetit në Kosovw, apo i njëjti mund të përdoret edhe si mjet për të rehabilituar apo fuqizuar pozita të caktuara në sistemin e drejtësisë që mund t’i shërbejnë politikës dhe grupeve të interesit”, thotë Miftaraj. /tesheshi.com/
