Serbia është një aleat i Moskës në Ballkan dhe një shtet neutral, për këtë arsye ajo ka nevojë për mbrojtje të vazhdueshme, veçanërisht pasi ajo është e rrethuar nga bazat ajrore të NATO-s, tha gjeneral majori rus Sergei Lipova.
“Bashkëpunimi ushtarak midis Rusisë dhe Serbisë është mjaft produktiv. Ne furnizojmë Serbinë me helikopterët tanë të sulmit Mi-35M, helikopterët e transportit Mi-17V5, tanket T-72, mjetet e blinduara të zbulimit BRDM-2MS dhe avionët MiG-29. Beogradi ka treguar vazhdimisht interes në blerjen e mundshme të sistemeve të raketave Pancir dhe S-400, i tha gjeneralmajor Sergei Lipov, Rosiska Gazeta me rastin e stërvitjes ushtarake “Slavik Shield 2019”.
Ai kujtoi që Serbia është një aleat besnik i Rusisë në Ballkan, sepse ajo nuk u anëtarësua në NATO dhe sepse nuk pranoi të mbështesë sanksionet kundër Moskës.
“Ajo nuk është në Aleancë, dhe ai status kërkon mbrojtje të vazhdueshme, veçanërisht pasi Serbia rrethohet fjalë për fjalë nga bazat e NATO-s në Rumani, Hungari, Itali, Bosnje dhe Bullgari. Përveç kësaj, të mos harrojmë separatistët kosovarë që bëjnë rregullisht provokime kundër serbëve dhe pranimin e Malit të Zi fqinj në NATO”, shtoi gjenerali, raporton Sputnik.
Ai tha se ishte e rëndësishme të sqarohej që Serbia ishte nën mbrojtjen e Rusisë, që do të thotë se asnjë çështje në Ballkan nuk do të zgjidhej pa Rusinë, shtoi gjeneral Lipova. /tesheshi.com/
