Në tre ditë fushatë elektorale, partitë në Kosovë kanë shpenzuar mbi 1 milion e 500 mijë euro. Shifra u bë e ditur nga përfaqësuesit e Demokracia në Veprim (DnV), të cilët ofruan dhe të dhëna të tjera nga monitorimi i tyre.
“Duke kalkuluar këto të gjitha me çmimet mesatare të tregut për secilin produkt ose shërbim, subjektet politike për këtë periudhë kanë shpenzuar rreth 1 milion e 64 mijë euro për organizimin e aktiviteteve në tërë territorin e Republikës së Kosovës”, u shpreh Mexhide Demolli-Nimani nga kjo organizatë.
Ndërsa përfaqësuesi i DnV, Artan Murati, tha se partitë po shkelin dhe legjislacionin në një pikë
“Është obligim ligjor që kur të mbahet një aktivitet elektoral, ai duhet të lajmërohet në Këshillat komunalë zgjedhorë, mirëpo jo të gjitha partitë politike janë duke e respektuar këtë obligim ligjor, sepse deri më tani 140 aktivitete kanë qenë të paralajmëruar, ndërsa 40 aktivitete të monitoruara nga vëzhguesit e DnV nuk kanë qenë fare të lajmëruara”, u shpreh Murati. /tesheshi.com/
