Presidentja e Përkohshme e Kosovës Vjosa Osmani akuzoi Bashkimin Evropian të premten se nuk e ka trajtuar Kosovën njësoj si Serbia në bisedimet e të dy palëve për normalizimin e marrëdhënieve.
Në një intervistë për Associated Press, Osmani tha se ajo mendon se Brukseli nuk ka mësuar nga gabimet e së kaluarës dhe se ajo e trajton Serbinë si një “fëmijë të llastuar”.
“Ne duhet të kemi trajtim të barabartë gjatë dialogut. Nëse kjo do të ndodhë, ajo do të jetë rruga për një dialog të suksesshëm në të ardhmen,” tha Osmani, njëherësh kryetare e Kuvendit të Kosovës.
Associated Press kujton se BE ka ndërmjetësuar në negociatat midis Serbisë dhe Kosovës që nga viti 2011 dhe shton se vetëm disa nga më shumë se 30 marrëveshje të nënshkruara të arritura përmes dialogut janë zbatuar që nga ajo kohë.
Osmani i tha AP se Kosova po krijon një precedent botëror duke u kërkuar zyrtarëve të saj të lartë të shkojnë në gjykatë vullnetarisht, ndërsa Serbia, “regjimi i së cilës vrau civilë, shumë prej të cilëve ishin fëmijë të vegjël, nuk po bën të njëjtën gjë”.
Humbja e Kosovës
“Ata mohojnë të gjitha krimet e tmerrshme që bënë në të gjithë Jugosllavinë, por veçanërisht në Kosovë gjatë viteve ’90,” tha Osmani.
Osmani, 38 vjeçe, u bë President i Përkohshëm i Kosovës në 5 nëntor, pasi ish-kreu i shtetit Hashim Thaçi dha dorëheqjen para se të nisej për në Hagë, në përballje me Gjykatën Speciale, e cila ka ngritur padi ndaj tij dhe ish-krerëve të tjerë të UÇK-së, për krime të pretenduara lufte.
Osmani tha se Serbia e humbi Kosovën në 1999, kur “abuzoi me integritetin e saj territorial dhe parimin e sovranitetit për të vrarë njerëz që jetonin në atë territor”.
“Kur ju të pranoni realitetin, atëherë ne mund të kemi një dialog të suksesshëm,” shtoi Osmani.
AP raporton se më shumë se 10,000 njerëz, kryesisht shqiptarë etnikë, u vranë në luftën në Kosovë në vitet ’90, dhe se më shumë se 1,600 njerëz renditen si të zhdukur.
Osmani gjithashtu tha se ajo shpresonte që bashkësia ndërkombëtare “do ta kuptonte se pa presionin e saj, Serbia nuk do të ndryshojë kurrë”.
Ajo shtoi se “ende nuk ka drejtësi për viktimat”, më shumë se 20 vjet nga përfundimi i konfliktit. /tesheshi.com/
