Ka një paradoks të dukshëm tek zërat kritikë ndaj Bashës në PD: kurrë nuk guxojnë ta prekin Berishën. Madje ngjan se dhe në patçin ndonjë inat më të këtë të fundit, atë ia nxjerrin Bashës.
Konfirmim i kësaj ka qenë deklarimi më i fundit i Astrit Patozit, një prej gojëve më të ithëta ndaj kreut demokrat.“Unë Sali Berishën e gjykoj nga veprimet. Ai në 2013 ka dhënë dorëheqjen dhe ka thënë që “unë nuk jam pjesë e vendimeve të rëndësishme të Partisë Demokratike dhe nuk bëj pjesë në debatin e brendshëm”, deklaroi ish-nr.2 në PD, i mënjanuar më pas nga Basha.
Sipas Patozit, Berisha nuk ka asnjë ndikim tek politika e ndjekur nga pasardhësi i tij. Por kjo nuk është hiçgjë në krahasim me veneracionin e shprehur ndaj Berishës nga të tjerë zëra në kohë, si Bregu, Doda, Topalli, bërë duke e kritikuar Bashën; pra thënë ndryshe, duke tentuar që ta zhvlerësojnë këtë fundit duke potencuar vlerën e paraardhësit të tij, liderit historik.
Por më e thjeshta: a nuk është Basha një produkt i Berishës? Sigurisht, sot e gjithë ditën. Jo vetëm si prezent në politikë, por dhe si investim që të jetë ai në krye të PD-së. Madje nëse ka një dështim të Berishës në planin brendapartiak, ai është Basha. Mbetet ende mister se cila ka qenë përllogaritja e tij prej të rrahuri me vaj e uthull në politikë, kur e ka zgjedhur Bashën si pasardhës në parti; për ç’cilësi, ç’aftësi, ç’merita, dhe se si do mundet PD-ja rikthehet në pushtet me një figurë që ka kuota frikshmërisht të ulëta besueshmërie?
Çështja është se nuk shkon hiç që të kritikosh Bashën duke e mbajtur atë të shkëpur nga Berisha. Kjo mund të vlente për rastin në PS, ku Nano iku nga partia pa kthyer kokë pas, dhe ku ngjitja e Ramës është krejt vetmitare në kuptimin e ndikimit të liderit historik. Për shpirt, Nano kurrë nuk do ia linte partinë Ramës, e parë kjo dhe tek ikja e shumë nanonistëve tradicionalë, sapo “i gjati” hyri në selinë rozë.
Ndërsa në PD është ndryshe. Basha është krijesë politikë 100 përqind e Berishës, dhe është në krye të PD-së vetëm për këtë fakt.
Ndaj, kritikët e tij të cilët këmbëngulin për një analizë të hollë dhe të imtësishme mbi humbjet elektorale në PD nën Bashën, duhet ta bëjnë ata më së pari analizën e hollë e të imët, kur është fjala për lidershipin e cungët të tij. La ta nisin nga gustot dhe nuhatjet politike të Berishës…nëse i ka të holla ose jo me përzgjedhjen e bërë.
Basha është pasojë, jo shkak! Dhe si i tillë (nuk)duhet gjykuar…/tesheshi.com/
