Arkivi Shtetëror kujton vrasjen nga grekët të Gjeneral Telinit, njeriut që zemëroi finjin jugor në ndarjen e kufirit me Shqipërinë.
“Më 27 gusht 1923, në një pritë të mirëorganizuar, mbeti i vrarë gjenerali italian Enrico Telini.
Përcaktimi i kufijve mes Shqipërisë dhe Greqisë ishte çështja që u bë shkas për vrasjen e Telinit. Më 9 nëntor 1922 Konferenca e Ambasadorëve e zgjodhi Telinin për kryetar të Komisionit Ndërkombëtar të Përcaktimit të Kufijve. Vendimet e marra për përcaktimin e shumë zonave brenda kufirit shqiptar, në bazë të dëshmive historike, ngjallën pakënaqësi në radhët e palës greke. Situata e krijuar vijoi me atentatin ndaj Gjeneral Telinit dhe të shoqëruesve që ndodheshin me të, çka solli dhe reagimin e Italisë. Komisioni Hetimor Ndërkombëtar i ngritur posaçërisht për këtë rast vërtetoi se vrasja ishte organizuar nga vetë qeveria greke. Shteti grek u ngarkua të paguante dhe një dëmshpërblim tejet të madh, bashkë me shpalljen fajtor për vrasjen.
Shteti shqiptar e nderoi veprën e Gjeneral Telinit duke vendosur emrin e një rruge në kryeqytet dhe bustin e tij më 1933. Më pas Telini u nderua edhe me një shtatore e cila u punua nga mjeshtri Odhise Paskali. Shtatorja u përurua më 27 gusht 1941, siç na njofton Qarkorja e Kryeministrisë që po vendosim bashkëngjitur. Në fotografinë e tretë paraqesim shtatoren e Gjeneral Telinit, dhe në imazhin e fundit vërtetimin e marrjes në dorëzim të shtatores nga Bashkia e Tiranës. Po ashtu, pamje nga homazhet e zhvilluara në vitin 1940 në monumentin e gjeneralit në Tiranë, ku patën marrë pjesë Shefqet Vërlaci dhe anëtarë të tjerë të qeverisë së kohës”, shkruan Arkivi. /tesheshi.com/
