E shtuna është “një ditë monumentale për Afganistanin”, shkroi Ambasada e SHBA në Kabul, disa orë para nënshkrimit të një marrëveshje me Talibanët, pas së cilës mund të përfundojë lufta 18-vjeçare në këtë vend, nisur që pas sulmeve të 11 Shtatorit.
Në mes të përgatitjeve për nënshkrimin e marrëveshjes në Doha, kryeqytetin e Katarit, zyrtarët e ambasadës theksuan se “bëhet fjalë për krijimin e paqes dhe një të ardhme të ndritshme të përbashkët. Ne jemi me Afganistanin”.
Sapo të nënshkruhet marrëveshja, armët duhet të ulen dhe Afganistani duhet t’i kthehet paqes së munguar në më pak së dy dekada, ku nga lufta kanë lënë jetën me dhjetra mijra njerëz.
Përpara nënshkrimit të marrëveshjes, Talibanët të urdhëruan të gjithë luftëtarët që “të përmbahen nga çdo sulm”.
“Sot, të gjithë luftëtarët talibanë janë urdhëruar të përmbahen nga çdo sulm … për të mirën e kombit,” tha Zabiullah Mujahid, një zëdhënës i Talibanëve, duke folur për Reuters.
“Shpresojmë që SHBA do t’i qëndrojë besnik premtimeve të saj nga negociatat dhe marrëveshja e paqes,” tha ai.
Delegacioni i Talibanëve, nga të cilët 31 janë delegatë, tashmë ka mbërritur në Katar dhe marrëveshja duhet të nënshkruhet nga lideri politik Abdul Ghani Baradar.
Ceremonia e nënshkrimit do të mbahet në Hotel Sheraton dhe do të dëshmohet nga Sekretari i Shtetit Amerikan Mike Pompeo. /tesheshi.com/
