Evertoni dhe Liverpuli patën një mesditë për t’u harruar në “Goodison Park”, në një derbi krejt pa shije.
Lojë e paqartë, pa fare mendim, pak raste, asnjë gol…
90 minuta të mërzitshme si nga pritësit, ashtu dhe nga mysafirët, aq sa çuditërisht nuk pati asnjë karton të nxjerrë nga gjyqtari.
Barazimi 0-0 ishte rezultati ideal për një derbi të tillë, të vlefshëm për javën e 33-të të Premier Ligës angleze.
Asnjë surprizë prej Evertonit, ku Rooney qe zhgënjyes, Walcott dha fare pak, dhe Cenk Tosun vuajti vetminë në qendër të sulmit.
Liverpuli, përndryshe, me mendjen te takimi i kthimit ndaj Mançester Sitit në çerekfinalet e Champions League-s, u mundua të ruajë forcat, me një formacion të ndryshuar, në të cilin spikaste mungesa e lojtarit të momentit, egjiptianit Salah.
Ca momente të rrezikshme në portat respektive në pjesën e parë u shoqëruan në të dytën me një epërsi të lehtë të Liverpulit, të zëvendësuar nga fundi i lojës me presionin disaminutësh të vendasve, që për pak gjë dhe mund të kishin shënuar.
Pak këtij barazimi, Evertoni duhet të presë ende për të arritur një fitore në derbi që prej 2010-s; Liverpuli e çoi në 17 numrin e ndeshjeve pa humbje në të.
Merseyside derby…
No Salah, no party… “Nuk ka festë pa Salah-un”, është një prej reagimeve më interesante pas këtij derbi. /tesheshi.com/
