Kreu i Kishës Katolike është shprehur në mënyrë të vendosur se muslimanët rohingia në Mjanmar kanë të drejtë që ta jetojnë besimin e tyre.
Papa Françesku ka kritikuar qeverinë e Mjanmarit për persekutimin e pjesëtarëve të kësaj bashkësie.
Në një deklarim të ashpër ndaj regjimit në Mjanmar, ai tha se muslimanët rohingia u janë nënshtruar torturave vetëm sepse duan të jetojnë kulturën e tyre dhe besimin musliman.
Papa Françesku i ka shprehur qëndrimet e tij në një fjalim të mbajtur gjatë mësimit javor të katekizmit.
“Janë dëbuar nga Mjanmari dhe zhvendosen nga njëri vend në tjetrin sepse askush nuk i dëshiron. Por ata janë njerëz të mirë, paqësorë. Ata nuk janë të krishterë. Ata janë njerëz të mirë. Ata janë vëllezërit dhe motrat tona,” ka shtuar ai.
Papa iu referua raportit të javës së kaluar të Zyrës për të Drejtat e Njeriut të OKB-së, ku gjejnë vend torturat, përdhunimet dhe vrasjet e popullatës rohingia, që kanë për kryerës të tyre ushtrinë e Mjanmarit.
Pavarësisht reagimit ndërkombëtar, Mjanmari nuk ka pranuar deri tani që të ketë kryer mizori ndaj pakicës muslimane, diku te 1.2 milionë banorë në shtetin verior Rahine, e që nuk kanë asnjë shtetësi.
Qeveria e Mjanmarit e kufizon qasjen në vendet ku është raportuar persekutimi i popullatës rohingia, që do të thotë se është shumë e vështirë të verifikohen raportet nga rajoni. /tesheshi.com/
