Papa Françesku tha se Ukraina duhet të kishte pasur atë që ai e quajti “guximin e flamurit të bardhë” dhe të negocionte një fund të luftës me Rusinë.
Në një intervistë për televizionin zviceran RSI, Francesku tha se çfarë mendon për ata që thonë se Ukraina duhet të dorëzohet sepse nuk arriti të zmbrapsë forcat ruse dhe të tjerët që besojnë se kjo do t’i jepte legjitimitet palës më të fortë. Gazetari në pyetjen e tij përdori termin “flamur i bardhë”.
“Ky është një interpretim, kjo është e vërteta,” tha Francesku, sipas pjesëve nga intervista.
“Fjala ‘negociata’ është një fjalë e guximshme. Kur sheh që je i mundur, se gjërat nuk po shkojnë mirë, duhet të kesh guximin të negociosh”, theksoi Papa.
Është hera e parë që Françesku përdor terma si “flamur i bardhë” ose “i mundur” në një diskutim për luftën në Ukrainë, megjithëse më parë ka folur për nevojën e negociatave.
Vitin e kaluar, Papa 87-vjeçar dërgoi një të dërguar për paqen, kardinalin italian Matteo Zuppi, për bisedime në Kiev, Moskë dhe Uashington.
“Duhet të negociojmë në kohë”
“Dikush mund të ndihet i turpëruar,” tha Françesku për negociatat. “Por me sa të vdekur do të përfundojë lufta? Duhet të negociojmë në kohë, të gjejmë një vend që do të veprojë si ndërmjetës”, tha ai, duke përmendur se Turqia është ndër vendet që kanë ofruar një rol ndërmjetësues.
“Mos ki turp për negociatat përpara se gjërat të përkeqësohen”, shtoi Françesku, i cili ka dërguar qindra apele për atë që ai thotë se është “Ukraina e martirëve”. I pyetur nëse ai vetë do të ishte gati të ndërmjetësonte, Francesku u përgjigj: “Jam këtu”.
Françesku i bëri komentet shumë përpara ofertës së fundit të presidentit turk Rexhep Tajip Erdogan për të mbajtur një samit midis Ukrainës dhe Rusisë, pasi intervista u regjistrua më herët.
Erdogan e bëri ofertën pas një takimi në Stamboll me presidentin ukrainas Volodymyr Zelensky, i cili tha se nuk do të heqë dorë nga asnjë territor, pavarësisht se dëshiron paqe.
Plani i paqes i presidentit ukrainas kërkon tërheqjen e ushtrisë ruse nga të gjitha pjesët e Ukrainës dhe rivendosjen e kufijve shtetërorë. Por Kremlini ka refuzuar bisedimet e paqes me kushtet e Kievit. /tesheshi.com/
