Fiorentina e Milan u ndanë me nga një pikë mbrëmë pas përballjes në “Artemio Franchi”, në të tetin takim të javës së gjashtë të kampionatit italian.
Vendasit u treguan shumë më të rrezikshëm, e patën një mundësi të artë për të kaluar në epërsi. Ilicic gaboi në minutën e 23-të nga pika e 11-metërshit.
Asnjë prej përpjekjeve nuk dha rezultat, me takimin të mbyllur 0-0.
Ndërkohë që Juventusi kishte fituar 0-1 të shtunën ndaj Palermos, e Napoli në të njëjtën ditë do të siguronte tre pikë me fitoren 2-0 ndaj Kievos, presionin ishte mbi ekipet e tjera pretenduese të dielën.
Zhgënjyese qe Roma, që humbi 3-1 ndaj Torinos. Totti shënoi golin e 250-të në Serinë A në sfidën në stadiumin olimpik të Torinos, por asgjë nuk e shmangu humbjen e kryeqytetasve, të pozicionuar në vend të katërt në renditje.
Interi barazoi 1-1 me Bolonjën, në një ndeshje të pëlqyeshme e me ritëm. Gjithsesi, Interi humbi një rast të mirë për t’i konsoliduar pozitat, edhe pse loja qe shpresëdhënëse.
Lacio fitoi pastër ndaj Empolit, 2-0, me Strakoshën për të dytën ndeshje radhazi në portë. Paraqitja e tij qe pozitive, ashtu si edhe e skuadrës.
Manaj zëvendësoi kapitenin Memushaj në minutën e 70-të, por në pak minuta në fushë i dha barazimin Peskarës në transfertën ndaj Xhenovës. Pesë minuta para mbarimit të lojës, Manaj i çoi shifrat në 1-1, për të mos ndryshuar më. Ky ishte goli i dytë i Manajt, pas atij të shënuar ndaj Sasuolos në një mënyrë pak a shumë të ngjashme.
Krotone – Atalanta dhe Kaljari – Sampdoria janë dy takime që do të luhen këtë mbrëmje, për të plotësuar javën e gjashtë të Serisë A. Te Atalanta pritet aktivizimi i Berishës në portë. /tesheshi.com/
