Gjatë një interviste në Top Story-n e së hënës, Pandeli Majko, një ndër figurat qëndrore të PS-së, edhe pse aktualisht vetëm deputet, por që për vitet e gjata në këtë parti e gëzon statusin e “senatorit”, ka dhënë disa deklarime të pazakonta lidhur me zhvillimet politike në përgjithësi, por dhe në atë çka po ndodh brenda gjirit të PS-së.
Por interesante kanë qenë disa shprehi të tij adresuar figurës, karakterit, apo mënyrës së si po qeveris Edi Rama. Fillimisht e ka quajtur kokëderr, por sipas tij një kokëderr që i duhet këtij vendi.
“Problemi është që ky kokëderr i gjatë… se kokëderr është. Nuk mund të qeverisësh këtë vend pa qenë kokëderr për të bërë atë që të shkon, në këtë këndvështrim. Ky është një vend goxha i vështirë për t’u qeverisur dhe për të qeverisur këtë vend nuk duhet të qeverisësh vetëm vlerat por duhet të qeverisësh edhe dobësitë e tij”, tha Majko.
Sa për zhvillimet brenda PS-së, ndryshe çështjen “Blushi”, Majko edhe pse i dha të drejtë kolegut të tij socialist lidhur me pretendimet statutore, tha se nuk ishte ajo mënyra e duhur e zgjedhur prej tij për të reaguar.
Sipas tij, Rama vërtet duket si diktator, por që nuk është ashtu, pasi siç tha, “në brendësi të tij fshihet një fëmijë”.
Majko e ka quajtur Ramën kryeministrin më të mirë që ka patur ndonjëherë Shqipëria, duke renditur disa prej reformave të ndërrmara prej tij, gjithmonë shoqëruar nga cilësi kokëderr.
“Reforma administrativo-territoriale është më e rëndësishmja. Dua të nënvizoj guximin për të bërë reformat e ashpra të munguara deri më sot, si energjia, legalizimi, balancimi i financave dhe mendoj se Rama është kokëderr në llojin e vet, duke mos i hapur rrugë FMN-së në disa raste. Ka gjëra që nuk shkojnë siç duhet, por duke parë këto nuk duhen harruar ato që janë bërë”.
Majko nuk ka lënë pa shprehur dhe afeksionin e tij të veçantë për Kosovëm, kur bëri me dije se së shpejti pret të bëhet zyrtarisht shtetas kosovar, kur u pyet nga Balla lidhur me kërkesën e bërë për pasaportë kosovare.
“Po e kam bërë kërkesën. Shpresoj të ma pranojnë. Kam dëshirë që të kem një apartament timin në Prishtinë dhe dua të shkoj në punë duke u nisur nga Prishtina dhe të vij këtu në Kryesinë e Kuvendit.
/tesheshi.com/
