Numri i madh i bizneseve serbe në panairin “Prishtina 2018” ka shqetësuar jo pak Vetëvendosjen për çka ka adresuar kritika ndaj të gjitha qeverive nga paslufta për favorizim e mosreciprocitet ndaj Serbisë.
Shefi i grupit parlamentar të VV-së, Glauk Konjufca në një konferencë për media ka thënë se është shqetësues favorizimi i produkteve serbe në këtë panair.
“70 janë produkte serbe dhe vetëm 1 nga Shqipëria. Të gjitha qeveritë e deritanshime kanë qenë të përcaktuara për një favorizim të skajshëm të produkteve të Serbisë. Kjo i bie që edhe qeveria është bashëpjesmarrese në këtë shkatërrim të shtetit”, deklaroi ai.
Edhe deputetja Fatmire Kollqaku ka shprehur pezmin e saj si po favorizohet Serbia e po lihet anash Shqipëria.
“Ne pa kurrfarë reciprociteti po i favorizojmë bizneset e Serbisë derisa sot kemi edhe një reagim të Ambasadorit të Shqipërisë se Oda Ekonomike nuk i ka lajmëruar me kohë për këtë panair”, ka theksuar ajo.
Kujtojmë se të martën edhe Klubi i Prodhuesve të Kosovës shprehu pakënaqësinë se si paratë e taksa-paguesve kosovarë po shfrytëzohen në promovimin e kompanive serbe në Kosovë, përkatësisht në panairin “Prishtina 2018”, të cilin e organizon Oda Ekonomike e Kosovës për çka ftuan të gjitha kompanive kosovare pjesëmarrëse në këtë panair që në shenjë proteste ta bojkotojnë këtë panair. /tesheshi.com/
