Zyrat e organit qeverisës të futbollit europian janë kontrolluar sot nga policia zviceriane pasi në dokumentet e firmës ligjore panameze doli dhe emri i ish-sekretarit të përgjithshëm, Gianni Infantino, i cili tani mban postin e presidentit të FIFA-s.
UEFA e ka pohur kontrollin, të quajtur vizitë prej saj. “UEFA mund të konfirmojë se sot patëm një vizitë nga zyra e Policisë Federale Zviceriane…”
Në njoftimin e vet, UEFA sqaron se është e gatshme për bashkëpunim të plotë me Policinë Federale e se i ka ofruar dokumentacionin përkatës.
Infantino ka nënshkruar gjatë kohës që punonte në UEFA, në vitin 2006, një marrëveshje për të drejtat televizive me dy biznesmenë të akuzuar nga FBI-ja për ryshfet.
Hugo dhe Mariano Jinkis i blenë të drejtat e transmetimit të Champions League-s dhe i shitën menjëherë ato me gati trefishin e çmimit të blerjes.
Gianni Infantino e ka mohuar të ketë bërë diçka të gabuar, duke u shprehur se ishte i tronditur.
Zyra e Prokurorit të Përgjithshëm të Zvicrës bëri të ditur se kontrolli policor te UEFA ishte motivuar nga dyshimi për keqadministrim kriminal dhe për shpërdorim. /tesheshi.com/
