Nga Blendi Gashi
Përkundët të ftohtit, prej kur është hapur panairi “Blej Shqip” në qendër të Prishtinës, në sheshin “Nënë Tereza”, ka tërhequr vëmendjen e qytetarëve.
Portali tesheshi.com ka vizituar sot panairin, me ç’rast ka parë një numër të madh të qytetarëve të cilët kishin dalë që në mëngjes për të shikuar produktet e ekspozuara nga kompanitë vendore, kosovare por edhe nga kompani që kishin ardhur nga Shqipëria për të eskpozuar dhe shitur produktet e tyre.
Përveç qytetarëve, në panair ishte edhe amasadori i Shqipërisë Qemajl Minxhozi i cili fliste me biznese të ndryshme.
Ike Koqi, e cila kishte ardhur nga Durrësi i Shqipërisë për të ekspozuar produktet e saj, punë dore, deklaroi për tesheshi.com se interesimi i qytetarëve për të blerë është tejet i vogël. “Sot kam ardh në Prishtinë në këtë panair. Deri në këtë orë që po flasim nuk ka interesim për të blerë produktet që kam në tezgën time. Megjithatë, shpresoj që në orët në vazhdim do të rritet interesimi dhe të kemi punë”, tha ajo.
Ndryshe, disa qytetarë që ishin të pranishëm në këtë panair deklaruan për tesheshi.com se ata kanë dalë për të shikuar produktet shqiptare, si dhe të blejnë ato produkte që dëshirojnë.
Në këtë panair do të ekspozojnë produktet e tyre kompani nga të gjitha trevat e shqiptarëve, Shqipëria, Kosova, Maqedonia, Presheva, Mali i Zi.
Qëllimi i këtij panairi është sensibilizimi i blerësve që të konsumojnë produkte shqiptare.
(tesheshi.com)
