Deputeti i Nismës për Kosovën, Haxhi Shala, është i sigurt se në javën e parë të shtatorit të këtij viti do të konstituohet Kuvendi i Kosovës, duke zgjedhur Kadri Veselin në postin e kryeparlamentarit.
Ai nuk ka dhënë shumë detaje se cili subjekt politik do ta mbështesë PAN-in për ta konstituuar legjislativin, por thotë se në bazë të bisedave me Ramush Haradinajn, Kadri Veselin dhe Fatmir Limajn e ka kuptuar një gjë të tillë.
Këto komente Shala i ka bërë gjatë një interviste për gazetën”Zëri”, ndërsa ka fajësuar për vonesën e deritanishme për mosthemelimin e institucioneve qendrore, LDK-në, Vetëvendosjen si dhe PDK-në, të cilat, sipas tij po bëjnë politikë inatçore.
“Për LDK-në deri më sot ishte e mirë PDK-ja, e cila ndihmoi që Isa Mustafa të ishte kryeministër, kurse sot thotë se nuk bën partia e Kadri Veselit. Të gjitha partitë duhet të kenë parime, në mënyrë që të mendojnë për të mirën e vendit e jo për vetveten”, ka thënë Shala. /tesheshi.com/
