Pamje të rralla të Pearl Harbor-it pas sulmit shkatërrues japonez më 7 dhjetor 1941 (video)

E diela e 7 dhjetorit 1941 filloi si çdo e dielë tjetër në Pearl Harbor, bazën më të rëndësishme të SHBA në Paqësor.

Marinarë dhe pilotë u zgjuan ngadalë nga gjumi, ndërkohë që flota amerikane kishte lëshuar spirancën në ujë.

Askush nuk kishte idenë për një sulm shkatërrues japonez që do të fillonte në 7:48 paradite dhe do të linte 2 mijë e 402 ushtarë amerikanë të vdekur.

“Bombat japoneze shkaktuan dëme të mëdha në forcat ajrore të Amerikës të vendosura në Paqësor”, thoshte transmetuesi britanik Movietone gjatë shfaqjes së pamjeve të regjistruara vetëm disa orë pas sulmit, të cilat mund të shihen në videon më poshtë.

Përveç që kishte lënë mijëra të vrarë, sulmi kishte shkatërruar aeroplanë dhe pista të tyre, dhe kishte fundosur katër luftëanije, në mesin e tyre USS Arizona, ku një bombë goditi një magazinë me municion në pjesën e përparme të saj, duke shkaktuar një zjarr të fuqishëm.

Në të njëjtën kohë kur u godit Pearl Harbor, Japonia sulmoi edhe Filipinet dhe Ëake dhe Guam, dy ishuj amerikanë në Paqësor.

“Por edhe në ditën e fatkeqësisë, fuqia detare amerikane filloi procesin e shërimit”, vazhdon transmetuesi  Movietone.

“Një kruzer i padëmtuar, i vënë në det, lë pas Arizonën e djegur – një simbol i vendosmërisë së Amerikës për të hakmarrje të plotë.”

Një ditë më pas, Shtetet e Bashkuara i shpallin luftë Japonisë, dhe tri ditë më vonë Gjermania dhe Italia i shpallin luftë SHBA-ve.

Në prill të vitit 1942, SHBA-të përgatisin sulmin Doolittle, duke goditur Tokion me 16 bombardues B-25 në një operacion të guximshëm për të rritur moralin e vendit.

Dy muaj më vonë, lufta në Paqësor mori një kthesë vendimtare, kur SHBA-ja mposhti pushtimin japonez të Midway, një bazë amerikane në mes të Paqësorit.

Avionët e bazave të aeroplan-mbajtësve amerikanë dërguan katër aeroplan-mbajtësit japonezë në fund të detit, ndërsa SHBA humbën vetëm një aeroplan-mbajtëse në këmbim. /tesheshi.com/