Trazirat në rrugë tronditën periferinë e Parisit, Nanterre, pasi një polic vrau një djalë 17-vjeçar gjatë një kontrolli trafiku.
Një turmë e zemëruar vuri flakën kazanëve të plehrave, makinave dhe një shkolle fillore dhe punonjësit e urgjencës u qëlluan me mjete piroteknike, thanë zyrtarët e qytetit.
Rebelët ngritën barrikada mes ndërtesave shumëkatëshe dhe penguan zjarrfikësit në ndërhyrjen e tyre. Trazirat nisën mbrëmë, me protesta para komisariatit të policisë në Nanterre dhe u përhapën në qytetet fqinje. Në Mantes-la-Jolie, bashkisë iu vu zjarri. Policia përdori gaz lotsjellës dhe plumba gome, por u detyrua të tërhiqej. Sipas autoriteteve janë arrestuar 15 persona.
Trazirat u shkaktuan nga vdekja e një 17-vjeçari mëngjesin e djeshëm gjatë një postblloku të policisë. Një video me telefon celular të incidentit, e konfirmuar nga France Info, tregon një oficer policie duke drejtuar armën në derën e shoferit të një makine të ndaluar.
Kur i riu pas timonit është larguar papritur, polici ka qëlluar nga afër dhe e ka plagosur për vdekje.
France Info raporton se polici është arrestuar nën dyshimin për vrasje.
Ministri i Brendshëm Gerald Darmanin tha se policia kishte nisur një hetim të brendshëm për incidentin. Vrasja shkaktoi zemërim në Francë dhe akuza për dhunë të tepruar policore.
Dënimi me vdekje nuk ekziston më në Francë. Asnjë polic nuk ka të drejtë të vrasë përveçse për vetëmbrojtje, shkruante në Twitter politikani i majtë Jean-Luc Melenchon.
Ai tha se policia duhet të reformohet rrënjësisht. Kryetari konservator republikan Eric Ciotti shprehu mbështetjen e tij për policinë.
“Mbështetje për policët tanë të mobilizuar sonte në Nanterre për të ruajtur rendin. Do të jetë një natë e vështirë, ju jeni mbrojtësit e sigurisë sonë të përbashkët. Asgjë nuk e justifikon këtë kaos,” shkroi Ciotti në Twitter. /tesheshi.com/
