Zëvendësndihmësi i Sekretarit të Shtetit të SHBA Matthew Palmer tha se qëllimi i të gjitha administratave amerikane është që të përfundojnë dialogun midis Serbisë dhe Kosovës me një marrëveshje për njohjen reciproke.
Në një intervistë të përbashkët për KTV me ndërmjetësuesin special të Bashkimit Evropian për dialogun ndërmjet Kosovës dhe Serbisë, Miroslav Lajçak, ai tha se Shtetet e Bashkuara e mbështesin fuqimisht këtë proces.
Siç tha ai, qëllimi është normalizimi i plotë i marrëdhënieve dhe për Shtetet e Bashkuara, kjo do të arrihej përmes njohjes reciproke, e cila do të ishte themeli më i palëkundur për stabilitetin, paqen, prosperitetin dhe një perspektivë evropiane.
“Por ajo që na duhet tani është që palët të ulen së bashku, të punojnë në këtë proces të ndërmjetësuar nga BE, të identifikojnë pika të mosmarrëveshjes dhe të punojnë së bashku për të gjetur një rrugë përpara, e cila na çon atje ku mendoj se të gjithë bien dakord dhe kjo është e ardhmja evropiane e Serbisë dhe Kosovës”, tha Palmer.
Kompromisi nuk duhet të shkaktojë frikë
Sipas tij, transparenca është shumë e rëndësishme në këtë proces, dhe shumë gjëra të mira janë arritur në dialog deri më tani.
Ai shton se është e rëndësishme që publiku në Kosovë të kuptojë se cilat janë çështjet, marrëveshjet, si mund të duken kompromiset dhe cili është progresi.
“Unë nuk mendoj se duhet të fillojmë nga e para, sepse është bërë punë e mirë gjatë viteve, marrëveshje janë arritur dhe zbatuar. Kjo ka ndihmuar në forcimin e bisedimeve dhe ka dhënë një bazë për bisedime të reja, por unë mendoj se ka vend për më shumë transparencë dhe bisedimet e hapura midis partive politike dhe më e rëndësishmja, me publikun në Kosovë,” tha Palmer.
Ai tregon se nuk ka zgjidhje në tryezën e negociatave pa kompromis, e cila është një fjalë që shkakton frikë në publik, sepse shpesh keqkuptohet.
“Kompromisi, si gjithmonë në negociata, do të thotë që Serbia ka ambicie, qëndrime dhe dëshira, ashtu siç i ka Kosova. Ka qëllime në këtë proces dhe duhet të kuptohen nevojat e palës tjetër dhe të bashkëpunohet në gjetjen e zgjidhjeve të pranueshme për të gjithë. Nëse do të ketë një marrëveshje, ajo duhet të pranohet nga qeveritë në Beograd dhe Prishtinë, në mënyrë të barabartë, por më e rëndësishmja, nga publiku në Serbi dhe Kosovë,” tha Palmer. /tesheshi.com/
