“Nuk kuptova pse më kërkuat dëshpërimisht që të isha pjesë e këtij paneli për Lindjen e Mesme”. Kjo ishte ndër fjalitë e para që kryeministri shqiptar Edi Rama tha gjatë aktivitetit të zhvilluar në kuadër të Konferencës së Sigurisë në Mynih, me titull: “Përtej konfliktit: Vlerësimi i rrugëve dhe pengesave që çojnë drejt paqes së qëndrueshme në Lindjen e Mesme”, pasditen e së shtunës (15.02).
Nis kështu një shkrim nga DW, dedikuar një çështjeje me përmasë hipotetike deri më tani: atë të ardhjes së mundshme të qindra palestinezëve në Shqipëri, duke fyer vetë palestinezët në këtë rast, pasi edhe nëse Shqipëria do të donte kjo s’ka asnjë mundësi të ndodhte. Pse? Sepse palestinezët, edhe si refugjatë, sërish aty janë, në atë tokë dhe afër asaj toke të cilën ata s’e lëshojnë edhe me çmimin e jetës.
“Asnjë nuk na ka pyetur nga administrata Trump por dhe nëse do të na pyesin – çka nuk është e logjikshme, sepse ne jemi në mes të Europës dhe si mund të vijnë tek ne qindra-mijëra vetë… – gjithsesi kjo është pjesë logjistike dhe ne jemi një vend i vogël. Por kjo nuk ka për të ndodhur, të paktën jo gjatë qeverisjes sime”, tha Rama në panel.
Më tej, ai vijoi me tezën e ulët të fajësimit të Hamasit për krimet e llahtashme të Izraelit, ndodhur dhe kur Hamasi nuk ekzistonte.
“Ne na vjen shumë keq për këta njerëz të cilët janë viktima të një prej diktaturave më të egra që ka ekzistuar ndonjëherë, që është Hamasi, por ne nuk jemi pjesë e kësaj historie dhe nuk do të jemi kurrë”, deklaroi paturpësisht Rama. /tesheshi.com/
