Mediat hebraike raportuan se grupi i parë prej 100 palestinezësh nga Rripi i Gazës po përgatitet të udhëtojë në Indonezi si pjesë e një programi pilot që synon inkurajimin e emigrimit vullnetar të palestinezëve nga Gaza.
Mediat izraelite raportojnë se programi pilot do të drejtohet nga gjeneralmajor Ghassan Alian, i cili drejton Koordinimin e Aktiviteteve Qeveritare në Territore (COGAT), një organ i Ministrisë së Mbrojtjes. Zhvendosja e 100 palestinezëve të lartpërmendur është planifikuar të kryhet përmes një programi punësimi në sektorin e ndërtimit në Indonezi.
Qëllimi i këtij projekti pilot është të provojë fizibilitetin e migrimit vullnetar, domethënë të inkurajojë mijëra banorë të Gazës që të fillojnë punë ndërtimi në Indonezi.
Mediat izraelite pretendojnë se ky program po zhvillohet në marrëveshje me qeverinë indoneziane, pavarësisht mungesës së marrëdhënieve zyrtare diplomatike mes Izraelit dhe Indonezisë. Nëse ky projekt pilot provon efektivitetin e tij, Drejtoria për Migracionin do të marrë drejtimin në përpjekjet e ardhshme për të zhvendosur banorët e Gazës jashtë vendit dhe për t’u ofruar atyre mundësi punësimi.
Kabineti i sigurisë i Izraelit miratoi javën e kaluar një propozim të ministrit të Mbrojtjes, Israel Katz, për të krijuar një drejtori të re brenda ministrisë që do të lehtësonte emigrimin vullnetar të banorëve nga Rripi i Gazës.
Drejtoria e sapoformuar kishte për detyrë të mbikëqyrte “kalimin e sigurt dhe të kontrolluar të banorëve të Gazës për largimin e tyre vullnetar”, sipas një deklarate nga zyra e Katz. Kjo përfshin menaxhimin e logjistikës si sigurimi i rrugëve të lëvizjes, përpunimi i individëve në vendkalimet e përcaktuara dhe koordinimi i infrastrukturës së nevojshme për të mbështetur udhëtimin nga toka, deti dhe ajri.
Qeveria izraelite ka numëruar çdo palestinez që është larguar nga Gaza që nga fillimi i agresionit. Sipas këtyre dëshmive, deri më tani mbi 35 mijë palestinezë janë larguar nga Gaza. Izraeli ndalon kthimin e çdo palestinezi që largohet nga Gaza për çfarëdo arsye.
Por a do funksionojë ky projekt i lig? Fjala është për mbi dy milion palestinezë që duhet ta lënë atë tokë. Me ccfarë është parë deri më tani, vështirë të ndodhë. /tesheshi.com/
