Pakënaqësi ndërkombëtare ndaj vendimit të Trump-it për tërheqjen nga marrëveshja e Parisit për klimën

Donald Trump i ka hapur vetes dhe administratës së tij një fushëbeteje të re me vendimin për t’u tërhequr nga marrëveshja e Parisit për klimën.

Ka thuajse një reagim të njëzëshëm në nivel global kundër këtij vendimi, një pakënaqësi që mund të ketë pasoja në zhvillimet afatshkurtëra apo afatmesme ndërkombëtare.

Një prej zërave të parë kundër lëvizjes së Trump-it ka qenë ai i paraardhësit të tij. Si ratifikues i Marrëveshjes së Parisit, Barack Obama është vënë në radhën e kundërshtuesve, duke nënvizuar faktin  se vendi i tij do të humbasë me këtë vendim.

Një ditë të trishtë për bashkësinë globale e ka quajtur zyrtari përgjegjës numër një i BE-së për ndryshimet klimatike atë të vendimit të Trump-it.

Ndërsa ka vënë në pah keqardhjen e BE-së për vendimin e njëanshëm të administratës amerikane, Miguel Arias Canete, komisioneri i unionit për veprimin e klimës, ka lënë të kuptohet se do të kërkohen aleanca të reja në këtë pikëpamje.

“Jemi në anën e duhur të historisë,” raporton Al Jazeera të ketë thënë ai.

Një zhgënjim të madh e ka cilësuar vendimin zëdhënësi i OKB-së, Stephane Dujarric, në një kohë që kryeministri kinez, Li Keqiang, u zotua se vendi aziatik do të vazhdojë ta luftojë ngrohjen globale.

Nga Gjermania, Franca dhe Italia ka patur një deklaratë të përbashkët, ku është hedhur poshtë kërkesa e Trump-it për rinegociim të marrëveshjes së Parisit për klimën.

“Besojmë fort se marrëveshja e Parisit nuk mund të rinegociohet, ngaqë është një instrument jetik për ekonomitë, shoqëritë dhe planetin tonë,” thuhet në këtë reagim të njëzëshëm të tre vendeve europiane.

E ashpër ka qenë posaçërisht gjuha e presidentit francez, Emmanuel Macron, që në një dalje televizive e ka çmuar vendimin e Trump-it si një gabim për interesat e vendit të tij, si një gabim për të ardhmen e planetit.

Macron ka qenë i qartë dhe i prerë në lidhje me mundësinë e një rinegociimi të marrëveshjes.

“Ju them vendosmërisht sonte: nuk kemi për të rinegociuar një marrëveshje më pak ambicioze!” /tesheshi.com/