I dërguari i posaçëm i OKB-së për Sirinë, Staffan de Mistura, do të jetë sot në Moskë, ku do të zhvillojë bisedime me ministrin e Jashtëm rus, Sergei Lavrov, në një përpjekje diplomatike për të shpëtuar armëpushimin në Siri.
Armëpushimi dymujor është në rrezik të marrë fund pas bombardimit të vazhdueshëm të Halepit në javën e fundit nga forcat qeveritare siriane.
Sulmet ajrore dhe të artilerisë së regjimit sirian kanë vazhduar dhe ditën e djeshme, duke lënë më së paku tre të vdekur.
Sekretari amerikan i Shtetit, John Kerry, i cili qe dje në Gjenevë për bisedime mbi gjendjen në Siri, e përshkroi konfliktin sirian si jashtë kontrollit.
Nota pesimizmi u panë tek ai kur deklaroi se nuk mund të bënte premtime që nuk mund të mbaheshin.
Kerry pati një bisedë telefonike me homologun rus, Sergei Lavrov, përpara se të largohej nga Gjeneva. Prej tyre u përsërit thirrja që të gjitha palët të respektojnë ndërprerjen e luftimeve, një thirrje tejet e thatë dhe aspak shpresëdhënëse.
Ministri i Jashtëm i Arabisë Saudite, Adil el-Xhubejri, që po ashtu mori pjesë në bisedimet e djeshme në Gjenevë, e ka cilësuar si krim atë që po ndodhte në Halep, si shkelje të të gjitha ligjeve humanitare. Ai tha se Beshar Esadi do të mbante përgjegjësi e se ka për t’u larguar nga pushteti o përmes një procesi politik, o me forcë.
Iniciativat e fundit diplomatike janë nxitur nga i dërguari i OKB-së për Sirinë, Staffan de Mistura, i cili ditë më parë u bëri thirrje SHBA-ve dhe Rusisë që të ndërhyjnë për të shpëtuar armëpushimin e shkelur pandërprerë tanimë. /tesheshi.com/
