Mendoni se po punoni tepër? Nuk jeni i vetëm nëse marrim në konsideratë popullaritetin e studimit të Ryan Avent për orët e punës. Por, largimi nga zyra më herët mund të sjellë më shumë përfitime sesa koha shtesë që mund të shfrytëzohet për jetën personale. Të dhëna nga OECD, klubi i vendeve të pasura, tregojnë një histori pozitive për ndikimin që kanë orët e punës tek efikasiteti në punë.
Grafika tregon për marrëdhënien midis produktivitetit (prodhimi bruto për çdo orë pune) dhe orëve vjetore të punës. Punonjësit më produktivë punojnë më pak kohë në zyrë.
Për shembull, grekët duket të jenë ndër më punëtorët në vendet e OECD, duke grumbulluar mbi 2 mijë orë pune mesatarisht në vit. Gjermanët, nga ana tjetër, janë krahasimisht më dembelë, duke punuar rreth 1400 orë pune çdo vit. Por produktiviteti gjerman është rreth 70 për qind më i lartë.
Çfarë do të thotë e gjitha kjo? Mund të tregojë që njerëzit që punojnë më pak orë, janë më produktivë. Nëse je i detyruar të jesh në zyrë për 12 orë me radhë, mund të hutohesh e të mos e kryesh dot detyrën menjëherë, por nëse e di se je në vendin e punës vetëm për shtatë orë, duhet të jesh më i fokusuar. Punonjësit që e marrin më lehtë punën, gjithashtu mund të jenë më pak të stresuar.
Ide të tilla nuk janë të reja.
Adam Smith argumentonte se: “Personi që punon në mënyrë të moderuar saqë të jetë në gjendje të punojë në mënyrë të vazhdueshme, jo vetëm ruan shëndetin për një kohë më të gjatë, por përgjatë vitit, kryen edhe sasinë më të madhe të punës”.
Kjo mund të gjykohet edhe si çështje e zhvillimit ekonomik. Në vendet më të pasura, njerëzit janë më produktivë (në këto vende kanë më shumë kapital të derdhur për njeri, infrastrukturë më të mirë dhe ekonomisje më të mirë) që do të thotë se mund të arrijnë prodhim më të lartë në një kohë të caktuar.
Ka edhe shmangie, sigurisht. Amerikanët janë relativisht produktivë dhe punojnë po relativisht me orë të zgjatura. Dhe brenda forcës amerikane të punës, orët e kryera nga të pasurit janë rritur ndërsa orët e punës së të varfërve kanë rënë.
Në përgjithësi, megjithatë, ndoshta duhet të jemi më vetë-kritikë sesa shumë punojmë. Nuk është vetëm gjë e mirë për shpirtin: mund të jetë edhe më efikase.
Përgatiti: Juli Prifti – /tesheshi.com/
