Ka ardhur dhe reagimi i dyshes së vëllezërve Orik dhe Laert Shyti, të konsideruar si kokat e grupimit “Hakmarrja për Drejtësi”, pasi Gjykata e Apelit i shpalli të pafajshëm anëtarët e saj. Të ndjerë të lehtësuar nga vendimi, ata kërkojnë që tashmë e ka radhën Berisha që të përgjigjet ligjërisht për akuzat ndaj tyre.
“Ndoshta kanë ndryshuar kohët dhe nuk besojmë se Sali Berisha do t’i shpallë edhe gjyqtarët që dhanë vendimin e sotëm anëtarë të ‘Hakmarrjes’. Natyrisht që nuk do ta pengojë vendimi i Gjykatës së Lartë, që shprehet se ‘Hakmarrja për Drejtësi’ nuk ka ekzistuar kurrë, por është krijuar bashkë me platformën dhe apartamentin e mbushur me armë nga shërbëtorët e tij, nëpunës të shtetit. Kjo dhe Vettingu janë dy arsye që mund ta pengojnë t’i shpallë gjyqtarët anëtarë të ‘Hakmarrjes’, apo të kërcënuar e frikësuar nga ‘terroristët e saj’”.
“Nëse nuk e ka kuptuar, atëherë po ia themi edhe një herë botërisht, se kurrë nuk ia falim krimin e shumëfishtë që ka kryer ndaj nesh dhe kurrë nuk ndalemi për të mbrojtur të vërtetën”, thuhet në reagimin e vëllezërve Shyti, të cilët e konsiderojnë “Hakmarrjen” thjesht një sajesë të ish-liderit demokrat.
Por ky i fundit nuk ndalet. Berisha ka akuzuar direkt Edi Ramën për pafajësinë e tyre.
“Duke dënuar me ashpërsinë më të madhe këtë vepër kriminale të Edvin Kristaq Ramës, u bëj thirrje shqiptarëve të bashkohemi më shumë se kurrë dhe me revolucionin tonë demokratik, që nis më datë 18 shkurt të shpëtojmë veten, fëmijët tanë, shoqërinë dhe Shqipërinë nga sundimi i kryebanditit dhe bandave të tij!”, u shpreh Berisha në Facebook. /tesheshi.com/
