Kreu i AKR-së, Behgjet Pacolli, ka arsyetuar mosnënshkrimin e koalicionit parazgjedhor me Vetëvendosjen, duke thënë se koha do të tregojë se ishte e justifikuar dhe realiste.
Pacolli, përmes një postimi në Facebook, ka paralajmëruar se mes këtyre dy partive ka dështuar, bashkëpunimi, por që mund të ndodhë pas zgjedhjeve të 11 qershorit.
“Shumëkush më pyet çka ndodhi me bashkëpunimin me Partinë Vetëvendosje. Ju them se me VV kemi punuar shumë në tre muajt e fundit. Jemi takuar shpesh. Ne, të ta kemi gjetur shumë bashkëmendimtarë, miq të mirë dhe profesionistë. Ne si AKR, jemi përpjekur deri në momentin e fundit dhe prapë mirëkuptohemi për bashkëpunim me miqtë e VV. Ka një arsye ( e interesit të përbashkët) që nuk bëmë koalicion parazgjedhor dhe koha do të tregojë se ishte arsye e justifikuar dhe reale. Besoj fort se me Vetëvendosjen do të jemi krah per krah në qeverisje, menjëherë pas zgjedhjeve”, thotë Pacolli.
Ai më tej shton se partia e tij dhe VV kanë unifikuar programet qeverisëse për ta kthyer Kosovën në një vend dinjitoz, të udhëhequr nga një ekip që e do shtetin dhe qytetarin e saj, që punon për një Kosovë të begatshme e madhështore, të civilizuar e të dashur për qytetarët dhe rininë e saj.
“Na priftë e mbara!!! #AKR për një Kosovë madhështore”, ka shkruar Pacolli.
Kujtojmë se Pacolli është lidhur në koalicion parazgjedhor me LDK-në e Isa Mustafës, ndonëse i kishte vënë vija të kuqe këtij subjekti, duke e bërë fajtore së bashku me PDK-në për keqqeverisje në vend. /tesheshi.com/
