Ministri i Jashtëm i Kosovës, Behxhet Pacolli, tha se veç amerikanëve, themelimi i ushtrisë së Kosoëvs nuk u përkrah nga askush. Porse me gjasë, kjo mbështetje do të vijë – tha Pacolli, duke folur në Top Talk të TCH.
“Ushtrinë nuk e mbështeste pothuajse askush nga faktori ndërkombëtar, por ne vazhduam rrugën tonë. Kemi pasur mbështetje në këtë iniciativë nga SHBA dhe po has mbështetje çdo ditë e më tepër kjo iniciativë. Me kohë, edhe faktorët e tjerë do ta mbështesin, pasi shumica e Evropës e mbështet pavarësinë e Kosovës dhe si shtet i pavarur, ushtria është një gjë absolutisht normale”, tha kreu i diplomacisë kosovare.
Ndërsa duke komentuar ekipin e ri negociator, Pacolli u shpreh i habituar nga shmangia e LDK-së për t’u përfaqësuar.
“Unë pres që LDK-ja të marrë pjesë pasi gjithmonë ka qenë aty në proceset e rëndësishme të Kosovës, por kjo parti deri tani ka preferuar të mbetet jashtë dialogut. Por, nuk besoj se do të qëndrojë jashtë tij, pasi është partia më e madhe në Kosovë dhe mentaliteti i saj është që të jetë prezente në procese të rëndësishme”, theksoi Pacolli. /tesheshi.com/
