Kryetari i Aleancës Kosova e Re (AKR), Behgjet Pacolli i është kthyer punës së tij të mëhershme, lobimit për njohjet e reja për Kosovën. Ai përmes një shkrimi në Facebook ka njoftuar se mbrëmë ka qenë në Ugandë, ku është takuar me presidentin Moseveni, me të cilin ka diskutuar për njohjen formale të Kosovës.
Postimi i plotë të Pacollit:
Mbrëmë udhëtova për në Uganda. Arrita në orët e hershme në Kampala, kryeqytetin e Ugandës, dhe menjëherë udhëtova për në vendin e takimit me Presidentin Moseveni, disa qindra km nga Kampalla.
Në një takim të gjatë dhe miqësor, diskutuam për hapat e mëtutejshëm në mënyrë që ky shtet të perfeksionojë formalisht njohjën e Kosovës. Gjegjësisht Ministria e Punëve të Jashtme të këtij shteti ta dërgojë notën e premtuar verbale për njohjen e Republikës së Kosovës.
Një është e sigurt, se Uganda do ta mbështesë integrimin ndërkombëtar të Kosovës.
Diskutuam edhe strategjinë për qasje të përbashkët të Ugandës për Angolën, Afrikën e Jugut dhe Etiopinë ku Presidenti Moseveni gëzon respekt të veçantë. Po ashtu, kemi rënë dakord për një takim të ardhshëm pas Zgjedhjeve Presidenciale të muajit shkurt.
/tesheshi.com/
