Një 54-vjeçar që konsiderohet si “pacienti zero” në Shqipëri, babai i 28-vjeçarit që e morri infeksionin në Firence e më pas ia ngjiti të atit, ka sjell gëzim në majat e shtetit shqiptar.
Ka qenë fillimisht ministrja e Shëndetësisë Ogerta Manastirliu, ajo e cila njoftoi se ai po shkon drejt shërimit nga CONVID-19.
“Lajm i mirë.
Pacienti i parë që nis rrugën e shërimit. Rezulton negativ kontakti i parë i pacientit zero që u identifikua me koronavirusin e ri në Shqipëri.
Do të kryhen testime të tjera për të monitoruar gjendjen e pacientit!”, shkroi ajo.
Pasoi Rama në reagim, duke shkruar:
“Një lajm i mirë! Kontakti i parë i pacientit zero që kurohet në spitalin infektiv doli negativ në testin e parë. Nëse edhe në testin e dytë pas 48 orësh ky rezultat do të konfirmohet, atëherë do të kemi të shëruarin e parë. Të presim dhe të lutemi që Zoti t’u japë forcë të sëmurëve dhe heronjve me bluza të bardha, në vijën e zjarrit me armikun. Durim, besim dhe durim, durim, durim!”.
E pas tij edhe Meta nuk u përmbajt.
“I emocionuar nga ky lajm i jashtëzakonshëm! Duke i uruar pacientit 0 shërim të plotë, shpresoj të marr së shpejti të njëjtin lajm për të gjithë të prekurit nga kjo pandemi, të cilëve ju shpreh mbështetjen dhe solidaritetin tim në këto momente të vështira!
Mirënjohje të thellë dhe falenderim për mjekët, infermierët, sanitarët dhe personelin mbështetës që janë në vijën e parë të frontit!”, shkroi kreu i shtetit. /tesheshi.com/
