Nga Bashkim Kastrati
Pacientët e Kosovës duhet të presin mbi gjashtë muaj për të bërë një incizim me rezonancë magnetike apo siç njihet ndryshe edhe si MRI. Ky incizim bëhet për të parë në detaje problemin shëndetësor dhe shpesh është i domosdoshëm për të përcaktuar saktë diagnozën e pacientëve.
Tesheshi.com ka kontaktuar me disa pacientë të cilët duhet që ta bëjnë këtë incizim dhe ka parë se pritja e tyre është shumë e gjatë edhe pse ata e kanë gjendjen e keqe shëndetësore.
Disa nga pacientët janë duke pritur terminin e përcaktuar qysh në muajin janar apo shkurt të këtij viti dhe atyre i është caktuar muaji gusht për të realizuar këtë incizim.
“Kam problem me boshtin kurrizor dhe mjeku më ka rekomanduar për ta bërë këtë incizim të thellë për të parë më në detaje problemin dhe se çka të bëjmë tutje. Që nga muaji shkurt e kam paraqitur kërkesën, ndërsa ma kanë përcaktuar terminin në muajin gusht, që është një afat kohor shumë i gjatë”, thotë njëri nga pacientët.
Ndërsa një pacient tjetër thotë se arsyeja e këtij afati është se një pjesë e pacientëve që kanë lidhje të ndryshme këtë shërbim e kryejnë shumë shpejt, brenda javës.
“Nuk po kemi mundësi që të shkojmë privat sepse nuk kisha pritur aq gjatë, po i bien shtatë muaj për të pritur në radhë për të bërë një incizim të tillë. Ky shtet ka dështuar me shëndetësi gjithmonë, pse të mos blejnë më shumë aparatura të tilla. Gjithashtu kjo është e keqe edhe për pacientin, sepse në gjendje të rëndë duhet që të presë me muaj”, ka thënë një pacient tjetër, që nuk dëshironte që të identifikohej.
E më e keqja është se ka nganjëherë edhe prishje rezonancës. Një nga personat që punon në radiologji ka thënë për tesheshi.com se këto prishje bëhen për faktin se është vetëm një aparat i tillë në krejt Kosovën dhe se ai punon vazhdimisht për çdo ditë kështu që paraqitet nevoja që ai kohë pas kohe të servisohet. E ky servisim i këtij aparati ndikon që disa nga terminët të shtyhen edhe për disa javë, pra nganjëherë nuk mjafton pritja as për shtatë muaj.
Në anën tjetër, pritjet e tejzgjatura të pacientëve për të kryer një rezonancë magnetike, në Qendrën Klinike Universitare, në Repartin e Radiologjisë, me apo pa dëshirën e tyre, kanë detyruar pacientët të orientohen në ordinanca private.
Ankesa për pritje të gjata ka pranuar edhe Shoqata për mbrojtjen e pacienteve. Kjo shoqatë ka pranuar edhe ankesa në lidhje me këtë çështje.
Blerja e një aparati tjetër e domosdoshme
Shpend Fazliu zëdhënës i Qendrës Klinike Universitare të Kosovës (QKUK) ka thënë për tesheshi.com se në tërë sektorin publik të shëndetësisë ekziston vetëm një Rezonancë Magnetike (MRI).
“Kërkesat për shërbime të MRI-së janë jashtëzakonisht të mëdha nga tre sektorët e shëndetësisë, përfshirë sektorin primar( qendrat e mjekësisë familjare) sektori dytësor ( spitalet e përgjithshme) dhe klinikat e QKUK-së, si sektor terciar. Kërkesat për këtë shërbim ndahen në prioritete, çdo herë përparësi kanë pacientët e shtrirë në klinika, pra të spitalizuar që nuk presin gjatë për këtë shërbim. Rastet ambulatore presin sikurse edhe në vendet tjera me shëndetësi me të zhvilluar, pra lista shtohet dita-ditës vetëm për rastet ambulatore që në shëndetësi njihen si raste të ftohta jo urgjente”, thotë Fazliu.
Ai thotë se ekzaminimet në këtë aparaturë zgjasin shumë dhe kjo merr një pjesë të madhe të kohës dhe numri i rasteve që kryhen në dy ndërrime është i kufizuar, pavarësisht se punohet para dhe pas dite dhe dukshëm ka shtim të vëllimit të punës.
“Zgjidhja është patjetër edhe një aparati i ri i MRI-së, për nevoja të QKUK-së, dhe ulja e referimeve të panevojshme për rastet ambulatore ku kjo po shihet nga rezultatet finale të rasteve të kryera, ku pjesa dërmuese e tyre dalin pa problem, përderisa ky ekzaminim është i shtrenjtë. Aparatura ka funksionar pothuajse në vazhdimësi dhe është rritur koha e punës në këtë aparaturë nga një ndërrim në dy ndërrime”, theksoi Fazliu.
Ai thotë se pagesat për shërbimin siç pretendohet të ndodhë pas sigurimeve shëndetësore do të reduktojnë shumë numrin e madh të rasteve, derisa për incizimet tjera (ekzaminimet në CT), pothuajse shërbimet merren në kohë shumë më reale.
“Një veprim tjetër që presim ta aplikojmë është mundësia e konvertimit të ekzaminimit të ordinuar për rezonancë në CT/64 shtresore. Pavarësisht se mjeku rajonal apo nga jashtë QKUK-së, i ka sugjeruar pacientit ekzaminim me Rezonancë, por kjo mund të keqkuptohet nga pacientit dhe në këtë situatë ne duhet të marrim në konsideratë këtë fakt për të mos shkaktuar pakënaqësi dhe “pasiguri” për ekzaminime që i është kërkuar pa alternativat tjera diagnostikuar poashtu shumë të sofistifikuara”, thotë Fazliu. /tesheshi.com/
