Ish-kryeministri Sali Berisha deklaroi para mediave se nuk ka marrë asnjë ftesë nga institucioni i akuzës për të dhënë deklaratat e tij, mbi çështjen ‘Doshi”, që ka përfshirë politikën shqiptare.
“Në çdo rast që Prokuroria të më thërrasë, unë do të jem aty”, tha Berisha. Një ditë më parë nga Prokuroria, u bë publike një njoftim për mediat, ku mes të tjerëve ishte ftuar për të dhënë deklaratat e tij edhe ish-Kryeministri Berisha. Më pas lideri historik i PD-së, theksoi se Meta po e përdor postin për aktin makabër që kishte projektuar vetë.
“Meta sapo doli nga Prokuroria, harroi Shkëlzenin, se dje u tha shqiptarëve ai që filmoi videon e Priftit, sot e harroi. Sot vazhdoi marrëzinë e tij për të shitur Doshin si deputet të PD. Ky qesharak e dritëshkurtër, beson se do bindë njerëzit se këtë akuzë Doshi po e bën si deputet i PD. E vërteta është e pashpresë të zbardhet me Ilir Metën si Kryetar Kuvendi, ndaj ai duhet të dorëhiqet. Meta është strumbullari i këtij akti të paprecedent”.
”Pashë sot ata që fshehin krimin dhe bllokuan hetimin për 6 muaj me radhë. Mendoj se paraqitja te Prokurori i Përgjithshëm e të akuzuarit kryesor, Ilir Metës në cilësinë e kreut të kuvendit, dëshmon papërgjegjshmërinë e tij të lartë dhe frikën e tij të tmerrshme nga skenari që ka gatuar dhe përdor po postin e njeriut të dytë më të rëndësishëm të shtetit për të mbrojtur aktin makabër që ka projektuar”.
Në fund, Berisha ka shmangur përgjegjësinë e Prokurorit të Përgjithshëm, Llalla, i cili edhe pse kishte dijeni për planin e vrasjes së Tom Doshit, nuk i nisi hetimet që para 6 muajsh.
“Prokurori do ta kishte të vështirë të lëvizte për një çështje mes kreut të Kuvendit, kryeministrit e Ministrit të Brendshëm. Nëse këta do ta çonin këtë çështje para 6 muajsh, atëherë, barra do të ishte e prokurorit të përgjithshëm, por në këto kushte do të ishte e pamundur”.
Më poshtë e plotë e gjithë shkresa e Prokurorisë ku theksohet se është ftuar edhe ish-kryeministri Berisha
Hetimi për rastin “Doshi”, Prokuroria fton zyrtarisht disa zyrtarë të lartë për të dhënë deklarimet e tyre për rrethanat e hetimit
Prokuroria për Krime të Rënda, në vijim të hetimeve të nisura kryesisht për veprën penale “Vrasja në rrethana të tjera cilësuese, mbetur në tentative”, parashikuar nga neni 79/c – 22 i Kodit Penal, të filluar në bazë të deklarimeve publike të deputetit të Kuvendit të Shqipërisë, z. Tom Doshi, ka marrë gjatë ditës së enjte (05.03.2015) deklarimet e tij, si edhe materialet mbi të cilat ka mbështetur qëndrimin e shprehur në media.
Në bazë të deklarimeve të z. Doshi, i cili ka deklaruar para grupit hetimor se ndaj tij dhe ndaj deputetit tjetër të Kuvendit të Shqipërisë, z. Mhill Fufi, ka pasur një tentativë për vrasje, Prokuroria për Krime të Rënda e konsideron të rëndësishme për hetimin e plotë të këtij rasti, marrjen e dëshmive nga ana e disa zyrtarëve dhe shtetasve të tjerë, për të cilët z. Doshi është shprehur se kanë dijeni për hetimin.
Për këtë arsye, Prokuroria për Krime të Rënda fton nesër zyrtarisht për të dhënë deklarimet e tyre lidhur me rrethanat e hetimit, shtetasit, si vijon:
- Z. Ilir Meta, Kryetar i Kuvendit të Shqipërisë
- Z. Edi Rama, Kryeministër i Republikës së Shqipërisë
- Z. Saimir Tahiri, Ministër i Brendshëm
- Z. Mark Frroku, Deputet në Kuvendin e Shqipërisë
- Z. Mhill Fufi, Deputet në Kuvendin e Shqipërisë
- Z. Eugen Beçi, ish-Drejtues i Prokurorisë për Krime të Rënda, aktualisht i komanduar drejtues i Prokurorisë së Rrethit Gjyqësor Elbasan
Po ashtu, në bazë të deklarimeve publike të bëra në sallën e Kuvendit të Shqipërisë, ditën e Enjte (dt. 05.03.2015), të cilat mund të jenë të vlefshme për këtë hetim, Prokuroria për Krime të Rënda fton zyrtarisht të japë dëshminë e tij:
- Z. Sali Berisha, Deputet në Kuvendin e Shqipërisë
Në vijim të hetimit, do të ftohen nga Prokuroria për Krime të Rënda për të dhënë deklarimet e tyre edhe persona të tjerë që mund të kenë dijeni për rrethanat e ngjarjes.
Prokuroria për Krime të Rënda ka regjistruar procedimin penal kryesisht për këtë rast në datë 03.05.2015, menjëherë pas deklarimeve publike të z. Doshi. Deri në atë moment, në organin e Prokurorisë nuk ka pasur kallëzim penal, por vetëm disa të dhëna indirekte, të cilat nuk përbënin bazë për fillimin e procedimit penal, në bazë të kerkesave te Kodit të Procedurës Penale.
Krahas marrjes së deklarimeve të zyrtarëve sa më sipër, Prokuroria për Krime të Rënda po vijon me kryerjen e të gjitha veprimeve të nevojshme proceduriale për të sqaruar plotësisht ngjarjen.
