Kjo është koha kur Kosova pret të ashtuquajturit kurbetçarë, pra emigrantët, motori kryesor ekonomik i saj.
Në këtë kontekst, presidentja Osmani u ka përcjell një mesazh mirësardhjeje atyre që vijnë “plot bereqet”, edhe duke gjallëruar jetën e fshatrave e qyteteve, ku rol kanë dasmat e shumta që organizohen, të cilat janë plot salltanete.
“Mërgatë e dashur, motra e vëllezër, sa herë të ktheheni në atdheun tuaj, ju ktheheni te familjet tuaja, te të dashurit tuaj, te kujtimet tuaja, te toka juaj.
Kthimi juaj është ritakim dhe ribashkim që kapërcen distancën dhe kohën. Bujaria dhe përkushtimi juaj për atdheun është i jashtëzakonshëm. Malli për Kosovën është një lidhje që na bashkon, kudo që të na çojë jeta.
Kthimi juaj këtu forcon identitetin tonë kolektiv dhe na kujton shpirtin e qëndrueshëm të popullit tonë. Kosova tani më shumë se kurrë ka nevojë për ju. Përvojat, aftësitë dhe perspektivat tuaja janë tejet të çmueshme, ndërsa ne vazhdojmë ta ndërtojmë një të ardhme më të ndritshme për atdheun tonë të dashur. Ju ktheheni në vatrat tuaja Ju ktheheni në Kosovën tuaj, atdheun tuaj shpirtëror”, shkruan Osmani, që siç mund të dallohet në fjalët e saj, i ka mikluar shumë me patriotizëm. /tesheshi.com/
